KellyChu - 展商料人流生意額與去年持平 動漫節開鑼 Cosplay專區最吸睛 | Executive日記

一連5日喺灣仔會展舉行嘅動漫節今日正式開鑼，今年除咗旅客門票外，展覽不設現場售票，3樓cosplay專區更首次改為付費入場。有參展商預計人流同生意額同上年差唔多，又推出香港特色盲盒吸客，其中包括珍寶海鮮舫嘅擬人機械人模型。

　　有主打香港情懷嘅參展商表示，預計客流量及銷售量與上年持平，所以備貨量亦與以往相若，又認為網上購票已經係大趨勢，相信改變能夠令入場流程更加流暢。佢哋今年專登推出盲盒系列吸客，有珍寶海鮮舫嘅擬人機械人模型，以及九巴、城巴、的士等本港特色交通工具機械人模型。

　　此外，香港玩具品牌Hot Toys今年亦都策動咗大型珍藏人偶展覽，其中最吸睛嘅莫過於《死侍與狼人》死侍1︰6比例珍藏人偶（會場特別版），會場限量800套現貨，唔買都一定要打張卡！

　　會場仲有多個矚目比賽登場，包括《動畫配音大賽@CP2024》，絕對係熱愛配音嘅參賽者，一展所長嘅最佳舞台，比賽將由職業粵語動畫配音員擔任嘉賓及評審。

　　而今年適逢動漫電玩節25周年，主辦方亦特別邀請咗日本人氣舞蹈團隊－Avantgardey為舞動大使，為一眾動漫迷帶嚟驚艷嘅編舞表演。

KellyChu