KellyChu - 「金庸與中國文化走向世界 」研討會 新聞界舉辦 重量級人物任嘉賓 | Executive日記

　　今年係本港已故知名武俠小說作家金庸誕辰100周年，香港新聞工作者聯會昨日舉辦「金庸與中國文化走向世界 」研討會，邀請到多位重量級人物擔任嘉賓，包括金庸前秘書、知名作家楊興安和金庸兒子查傳倜。香港新聞聯副主席、星島新聞集團行政總裁兼社長蔡晋亦有出席研討會。

　　新聞聯主席李大宏表示，金庸作品係全球華人共同語言，探討金庸能為中華文化嘅傳承與發展，貢獻力量。新聞聯會長張國良指，金庸小說可成為愛國傳統文化嘅陣地，而建造金庸紀念館，有利增加港人對國家及民族文化嘅認同，遊客亦可以有一個了解中國傳統文化嘅窗口，「能夠讓中國文化走向世界，這個現實意義是很重要的。」

　　同場嘅立法會議員何俊賢憶述，自己讀中學嘅時候，班上男同學基本都熟讀金庸​​小說，形容金庸構建咗佢個人對於中華民族嘅認知及價值觀。

　　立法會議員嚴剛亦表示，家國情懷係金庸作品不變嘅主題，其筆下嘅江湖世界，充滿咗中國傳統文化懲惡揚善、行俠仗義、路見不平拔刀相助等正能量，呢啲價值觀亦能引導、啟迪青少年走正道、行正義、做正事。

　　佢又提到，金庸作品以往大多改編成電視劇，建議能夠以現在年輕人喜好嘅動漫方式，拍攝出能媲美《功夫熊貓》嘅「金庸武俠動漫大片」。

　　現持有金庸作品版權嘅查傳倜則回應指，作品應該點樣改編成動畫電影，劇本會否或如何修改、刪減會係個問題，要將全本《射鵰英雄傳》拍成動畫電影，難度好高，抽一啲出來拍，又覺得整個版權費好貴，所以改編係有一個難度。

　　楊興安擔心金庸小說30年後有沒落趨勢，佢指現時年輕人已經唔鍾意睇書，「一聽之下有36大冊，近3000萬字，豈敢動手翻翻？」

　　影視作品雖然更易及吸引大眾，但實質只接觸到故事和人物嘅皮毛表相，難以體會到小說中嘅深層含義，建議政府設立創作獎，推廣寫作培育作家，並推廣閱讀金庸小說。

KellyChu