古星輝 - 5G手機結合AI　助英超球證判決 | 乜都5G

今年夏天體育盛事浪接浪，先有歐洲國家盃，再有奧運，深受全球足球迷愛戴嘅英超今晚開鑼。英超賽會喺今年4月，宣布就針對近年賽事中為人詬病嘅視像輔助球證（VAR）推出半自動越位系統，可望縮短球證判決時間，日前亦公開有關系統嘅技術細節。

　　記得喺剛過去嘅巴黎奧運已經應用咗唔少5G手機同AI技術，英超賽會日前公布同一間體育數據科技公司合作，喺各比賽場地引入半自動越位系統。於比賽當日，喺球場會設置至少28部iPhone 14或更新嘅手機，而手機更會加上防水機殼及散熱風扇，確保賽事期間可以保持高效運作。

28部iPhone結合AI　極速提供分析

　　根據官方資料，呢個系統係以5G手機結合AI嘅技術，極速作出分析。先由手機以高達200幀率於不同角度攝錄場內球員，遠較傳統攝錄器材嘅60幀率為高，而系統可以7000至10000點記錄每名場內球員，準確記錄球員的動作及位置。場內iPhone會將攝錄的影像傳送至AI系統，隨即生成球員嘅立體影像，系統一旦懷疑越位，可於短時間內作出決定並通知球證，幫助球證於短時間內作出準確判決，新系統較以往單純倚賴VAR時間至少縮短30秒，加強賽事的連貫性。

　　以往要設定相似系統，拉線及設置方面會相當複雜，現時利用5G及手機就解決了設置上最大障礙。

　　除咗幫助越位判決之外，呢個系統仲有唔少延伸應用，例如可以根據球員不同動作，提供更多有關表現嘅分析。官方表示半自動越位系統喺今晚嘅賽事暫時未會應用，預期喺第4季就會正式啟動。

　　喺今年初，香港嘅板式網球大滿貫已將5G同VAR結合使用，如今英超再以5G手機加入AI技術，提升越位判決質素減少賽事停頓時間，可望日後應用喺更多不同場景，提升觀眾體驗。

和記電訊香港執行董事及行政總裁
古星輝