古星輝 - 5G.生態.環境 | 乜都5G

5G技術應用有助促進數碼經濟發展，大家都聽得多；但其實5G已經逐漸融入生活不同領域，與改善社區環境衞生，保育自然生態，以至加強社會嘅可持續發展，息息相關。

　　喺香港不時都聽到有鼠患問題，聽講相關部門捉一隻老鼠嘅成本要8200多元，仲要出動到紅外線自動感應器及超聲波幫助滅鼠。可能無咩人會諗到，5G喺防治鼠患方面一樣做到嘢。

保護及研究野生動植物

　　5G防治鼠患方案好簡單，只要喺懷疑有鼠患嘅地方放置熱感探測攝錄機或動作探測攝錄機，系統就可以全天候監控周圍環境，喺偵測到郁動嘅生物時，就會經5G網絡將影像及數據高速上傳到雲端，再由人工智能分析，推算出老鼠嘅行走路徑及巢穴位置，幫助捕鼠。

　　除改善環境衞生方面嘅應用，5G亦有助保護同研究野生動植物。全球海拔最高嘅珠穆朗瑪峰5G基站，不但有助緊急救援登山人士及通訊，亦方便喺國家級自然保護區內工作嘅科研人員，即時上載監測數據回總部。

　　遠至歐洲，我哋喺奧地利嘅姊妹公司就曾經用5G蜜蜂計量器拯救蜂群。話說當地嘅蜜蜂數目因各種原因不斷下降，影響自然生態及蜂農生計。佢哋於是幫手喺蜂巢口，裝設5G計量器；蜜蜂出入時，經過一個光學感應器，系統就會透過5G實時將數據傳送到人工智能平台，監察蜜蜂數目有否驟降，方便蜂農採取應變措施。

管理農務  防治病蟲害

　　5G賦能各行各業，更被譽為應對全球氣候變化嘅技術之一，喺農業方面嘅應用亦發揮功用。例如有農夫使用5G無人機監察殺蟲劑使用情況，以精準計算噴灑份量，從而減少殺蟲劑使用量達一半。另外，內地及台灣都有果農，透過5G全方位監察各種農業環境參數及作物生長情況，精準管理農務及防治病蟲害，做到「南果北種」或「北果南種」，提高種植效率及高經濟價值作物嘅收成。

　　5G助力不同行業節能、「脫碳」，加強環境保護，對於未來全球嘅綠色可持續發展有重要影響力。

和記電訊香港執行董事及行政總裁
古星輝