買基金

    每個打工仔都要供強積金，強積金既錢就係投資基金，亦有好多人喜歡月供保險連投資基金既儲蓄計劃，保險經紀見客，慣常會打開一個表，密密麻麻既數字，列出你每月供幾多幾多，第N年你就可以提取幾百萬啦！

    回想小弟第一次買基金，係97年初出社會，用老闆既公積金月供亞洲股票基金，1年幾後唔做，98年提供款時，萬幾蚊既供款，竟然得返3千幾，跌幅超過7成！當時小弟亦「好天真、好傻」，以為公積金同基金係「穩陣野」，有人基金經理「睇住」，一定唔會輸錢，點知亞洲金融風暴，亞洲區股市大跌，我隻基金既跌幅，比起一隻二、三線既股票還要多，以為基金好安全，一直冇留意佢既表現，當收到3千幾蚊既支票個刻，只可以用今日既潮語「o咀」來形容。

    所以，買基金第一件事，對基金表現要有合理期望，每隻基金都會追蹤一個指標(Benchmark)，以一隻香港股票基金為例，恆生指數(又叫大市)就係指標，隻基金既目標就係「跑贏大市」，即係如果大市跌，隻基金又跌，但跌得少過大市，呢隻就係一隻「好」既基金，所以「好」既基金唔係實賺，我地買基金，只能期望佢既表現跟大市，大市升幾多%，隻基金又跟住升幾多%，如果你期望大市升少少，你隻基金可以升多多，又或者大市跌多多，而你隻基金可以唔跌，仲可以大升，呢個就係不合理既期望。 

    第二件事，要明白基金有收費，你買基金，等同於搵基金公司幫你投資，基金公司唔會白做，首次認購費、基金管理費、轉換費、表現費，贖回費等等，都係基金公司既收入，亦係你既支出，唔好睇少幾個%既收費，羊毛出自羊身上，支出多表示你的回報減少，你買基金可賺可蝕，但基金公司就實賺，因為基金公司最大既收入係來自管理費，而管理費係按你戶口結餘，收取一定百分比(例如2%)做收費，而你戶口結餘，只會係多錢或少錢，永遠唔會變負數，所以對基金公司來講，只會係賺得多，或者賺得少之別，唔會蝕錢，倒過來說，你買基金，賺錢既時候會賺少左，蝕錢既時候又會蝕多左，仲記得，以前有個月供儲蓄計劃，頭半年唔可以停供，停供一毫子都冇，因為頭半年既供款，全部係經紀同基金公司既收費。

    當然，買基金亦有佢好處，例如收場費少，買一手匯豐要5萬幾，每月儲3千都要年幾先可以買一手，儲夠錢又可能已經升左，基金可以每月供最少1千，定額月供，平又買，貴又買，平均成本，又例如本地小投資者，好難直接買外國既股票，可以透過基金，例如日本基金持有日本股票，歐洲基金持有歐洲股票，可以多的選擇。

    市面又有所謂「保證/保本基金」，運作方式其實好簡單，佢將你大部份既錢，放係好穩陣既定息債卷，只用你少部份既錢做高風險炒作，債卷部份到期收返本金，所以「保本」，你少部份既錢加上債卷收到既利息，就進行高槓桿炒作，你隻基金可唔可以upside個「保證回報」，就係睇呢個炒作部份，「手風」好時就有upside，倒楣輸哂就冇upside，其實你都可以自制「保本基金」，你將錢全數做銀行定期，到期就可以收返個「本」，已經係「保本」，再將期間收到既利息，部份買期權、認股証、買馬、買波，手風順時，保本之餘賺突都唔係好出奇啫。

    每當股市大跌市後(即係今時今日，恆指由上年高位跌3成)，冇人敢買股票既時候，銀行同保險經紀，都會好熱衷推銷呢類基金，可能見人股票輸到怕，呢類講明唔「100%保本」，又或者「保證5%回報」既基金都特別好賣，係經紀/sales既眼入面，佢地既工作同收入係來自賣product，最緊要你靠買，越多越好，至於你買咩product，唔係佢最關心既野，所以，市場鍾意咩product，佢地就會賣咩product，唔一定係你需要既product，小心。