小咪公主, 小威, 黃貓 & 芝麻已經做左好朋友喇~~

2008/12/16 13:40:11 網誌分類: 親情

16 Dec

話說三日之前抱左新成員芝麻返屋企之後, 咪爸咪媽一直都好驚會控制唔住班貓大帝, 怕佢地會打交, 又擔心佢地會爭寵, 總之我地就.... 忐忑不安咁....

但係, 估唔到, 原來芝麻加入左呢個大家庭之後, 各家庭成員竟然好快咁接納左佢, 而且舊成員之間既關係竟然仲好左.

就等咪媽報告一下班仔女既最新情況喇:

小拔 (狗家姐): 一如以往, 同所有人貓狗都夾得到, 完全係冇難度呀.

小忠 (狗細佬): 每一個新成員返黎之後, 小忠忠都會勁八卦咁衝過去聞呀聞~~ 聞呀聞~~ 不過, 聞完之後, 就會即刻做到好朋友, 可以一齊坐沙發睇電視, 又可以俾貓貓o係佢個身上面爬來爬去, 超攪笑.

小咪公主:

小咪係一隻好騰雞既小公主, 佢唔怕小拔小忠, 反而怕小威黃貓. 之前小咪都用左好耐時間先接納到小威, 而當黃貓一入屋, 小咪既備戰狀態又著左紅燈, 一日到黑都係船頭驚鬼船尾驚賊.... 總之就唔鐘意黃貓成日含情脈脈咁望住哂. 不過, 自從芝麻入左門之後, 黃貓就分左一半時間去霖條新女, 所以小咪就可以鬆一口氣, 安安樂樂咁哂下太陽伸個懶腰. 而小咪o係初初見到芝麻既頭兩日, 都係有d驚, 不過明顯係比之前見到小威黃貓要黎得鎮定, 今朝早, 小咪仲俾細妹上左佢個私家窗台行左幾個round, 全程都冇fee冇唔高興, 咪爸咪媽見到都好開心呀.

小威:

${#ap_20081122014118678.jpg}$

呢個小朋友呢~~ 成日都掛住玩, 有時家姐俾佢追到唔耐煩, 都會一掌推開佢, 咁小威就會好似好無聊咁自己係度walk.... 不過芝麻黎左之後, 小威就多左個目標, 有時小威會同芝麻玩下聞鼻鼻, 又或者靜雞雞咁玩跟蹤, 難得芝麻又唔怕佢, 總之就你有你跟, 我有我行, 有時偶然撞到, 就會點下頭, 問侯一下, 然後就唔知講咩好.... 誰令我.. 能情深一片.. 令我輕柔.. 如水清澈.. 令我心靈.. 回復恬靜.. 令我拋棄.. 內心牽掛.. 重拾~~ (咳咳, sorry, 講講下忍唔住唱番兩咀添, 呵呵)

黃貓:

呢一個仔絕對係好色之徒, 成日咸咸濕濕望住女仔個屎忽, 我過左聖誕節冇咁多野做時就會即刻捉佢去desex. 不過話時話, 佢都係好乖既, 不過就成日走去撩威仔過番兩招囉, 好彩, 佢地都係點到即止, 過下日晨啫.

芝麻:

${#ap_20081214010737998.jpg}$

芝麻好快就適應左新環境, 第二日已經肯食野, 濕糧乾糧都好鐘意食, 仲痾左一大督尿尿落砂盤, 而第三日仲痾埋屎屎添. 佢依家已經住得好自在, 而且仲知道遊戲時遊戲, 但係咪媽一叫就識得入籠籠瞓覺覺~~ 佢真係好叻女呀, 我地一家都好鐘意佢, 最重要就係, 連小咪都唔抗拒佢, 有好大機會可以做到一對好姊妹!!!! 我地呢次真係開心到好似中左六合彩呀.