銅鑼灣名人餐廳擬重建 da Domenico或搬竇

2013/03/08 09:43:40 網誌分類: 生活

08 Mar

        唔少姊妹同Kelly一樣，鍾意去銅鑼灣蒲，希慎廣場去年八月開咗後，成為閒逛好去處。聽聞希慎打算將附近新寧大廈同新寧閣合併改建成綜合寫字樓同商場，打造一個「黃金三角」購物圈，主意好好，但小妹關心好出名嘅意大利餐廳daDomenico去向，餐廳食材講究，海鮮pasta最出名，唔少名人都幫襯，好似賭王何鴻燊一家、大劉、潘迪生夫婦、余錦基、關之琳、葉倩文、周麗淇、陳志雲等，若要改建，間餐廳唔知要唔要遷址呢？

        喺銅鑼灣開平道八號、新寧閣嘅「daDomenico」，係低調名人食堂，老闆亞歷士係意大利人，佢家族喺羅馬有家出名嘅小館，佢娶咗香港太太後，就喺香港開店，唔少人都話daDomenico係最正宗意大利餐廳，由蔬菜、肉類到海鮮，甚至黑醋，全由意大利空運到港，必點招牌菜係紅蝦意粉同龍蝦湯，雖然紅蝦意粉盛惠五百幾蚊，唔少人搶住光顧。

        間唔中會幫襯嘅余錦基話，佢鍾意呢個紅蝦麵，次次去親都食佢，若然餐廳搬，佢唔擔心食唔到，餐廳賺錢，唔會執，最多搬竇，佢哋咪跟住去食。余錦基反而可惜嗰啲因為加租而結業嘅老舖，佢話香港租金飆升，好多傳統食肆捱唔住，執咗再搵唔番呢種味道。

        KellyChu