【十一】掌色之謎

當你一話睇掌，男性朋友便自然伸出左手給你，女性朋友則會拿出右手來，其觀念來自男左女右。其實掌相是兩掌共睇，面相也是兩邊共睇。一句男左女右，不知何年何月開始搞得以為單睇一隻手掌。相反，你要人兩手齊出，反而被投以奇異眼光，反問你：「乜唔係男左女右o既咩？」認真吹漲。

其實睇掌有四部曲，一先睇掌色、二睇掌形、三睇手指、四睇掌紋。本來最後先睇掌紋，但現今好多人一睇掌就先睇掌紋，其實唔係好o岩。因為由掌紋所反映出的事情，與掌的氣色是息息相關的，在面相學中也如此，部位重要，但氣息更重要。掌學一樣，掌紋重要，但氣息更重要。

掌的顏色好重要，如果掌色生得靚，而掌型唔合格、手指唔合格、掌紋一塌糊塗都唔緊要，起碼呢個時期掌色好，掌運夠已經幫到你。

當然，掌色是有時期性的，且經常會變，若然好的氣息能維持一個長時期，表示你得到掌運幫助一個長時間，即使隻掌幾差都好，在這段期間內都唔會太衰。但好掌色只維持三兩天，咁就三兩天之後要再睇你掌色變成點，再作估量。

掌色，掌的顏色，其實越淺越好，色越深越暗越唔好。

左手，可以睇過去一年之氣色。右手，睇目前及未來一年的氣色。若然左手氣色靚過右手，即表示去年運程比今年好，今年較長，但右手氣息靚過左手，即表示今年運程唔錯，睇掌先由氣色上判斷。另外，左右兩掌各具顯示，以一般人以右手作為常用手計，左手睇三十歲前情況，以及先天安排；右手睇三十歲以後情況及後天顯示。

而左撇子則左右互換，因為常用手的變化，乃跟據性格及思想的改變，因而對後天有影響，亦因此你會發現常用手的指甲，會比另一隻手的指甲較為堅硬。因常用手可以反映你目前情況，因為左右兩手分別反映不同的狀況及不同的氣息，若要知道過去、現在、未來的運氣走勢，必先在掌色中判斷。

掌色潤白：為掌中最好之顏色，表示運氣好，舒服而得財，勞而有獲且唔辛苦，正所謂：「唔駛點做都好掂，財來自有方。」

掌帶粉紅：有少許辛苦，但運氣唔錯，且在不久將來會有新的起步，所以會有少少勞碌，亦因將會有新計劃展開而開始忙碌。

掌帶紅點：掌上泛現一點點紅色，中國人稱之為硃砂掌。中國人話硃砂掌好，表示有工作、有寄托、有o野做，因為以前有工作才有飯開。但其實硃砂掌表示辛苦、有o野諗、有壓力，屬於辛苦的掌。

掌帶紅色：整隻掌通紅，泛現一片紅色，表示你辛苦到不得了，壓力大又多o野諗，好煩，好多o野有待解決，甚至工夫一籮籮，不知如何是好。好處是只要做事有決心又夠堅定，便會容易成功，問題一定得到解決。壇處是脾氣暴燥，火氣大，且易有心臟病。

掌帶紫色：好辛苦o既掌，極度辛苦，且要留意血液及皮膚問題，容易血熱，出現皮膚痕癢，要注意心臟，容易心臟病。

掌帶黃色：小心身體出現問題，尤其注意肝臟，易為肝虛、膽弱。五臟六腑要留意，通常都容易出事。

掌帶青色：多數腸胃出現問題，消化系統容易出問題，風重身虛之故，容易肚疴，好多女性掌帶青色的。

若然掌中短期出現的顏色，表示短期出現以上情況。長期出現以上顏色的話，則表示長期會有以上的情況出現。例如掌色潤白，發之運氣好，出現兩三天潤白，這幾天運氣好。長期潤白，長期運氣好。如這兩兩三天掌現青氣，則小心腸胃、肚疴之類，因此而要小心飲食。如長期掌色瘀紅，或紫色，則要留意身體，檢查心臟，慎防心臟病或中風。

此文曾於頭條日報專欄「玄學人」中刊登，由於報章版面有限，不能足本刊登，現將全文重新刊載在Blogcity與讀者分享，如有植字方面的錯漏，敬請指教。