肯同你捱麥記嘅女人
係咁嘅,身邊啲朋友成日討論有咩擇偶條件,巴巴閉閉咁分享佢地嘅心得。話咩要有劉心悠嘅面孔、陳法拉嘅笑容、何家淑女嘅後台、Angela Baby嘅身材。我多數就會一句車埋去:「咁個條女,會唔會陪你去食麥記先?」
個宅男肥仔拎住個巨無霸,臉容扭曲到好似畢加索啲名畫咁,生命去到一個非常危險嘅階段。聽到依個問題,佢已經從最終幻想中解放出黎,因為他已經死了。
唔想講都要坦白講,一個男人去到廿幾歲,拖住條女,「去邊度食飯」依個問題,仲難拆解過「南北韓危機」同「阿仙奴N年無冠」。
有時銀包就剩得個幾廿蚊,衰啲咁講句,入星巴克買杯Latte扮下高尚,都已經要之後行路返屋企。
隔離有個女朋友,想食餐經濟啲嘅,都要左諗右諗………………
「食譚仔啦,我今日想食米線!」女朋友說:「吓,好逼個喎……」
「沙嗲王啦!都坐得幾舒服!」女朋友說:「吓,要等勁耐個喎……」
「不如食碗雲吞麵啦!你又話想減肥嘛!」女朋友說:「吓,勁多阿叔喎……」
「食麥記?」你真係講都唔好講!就算佢肯,你都唔好意思問啦。
試過同一位已成歷史塵埃嘅女朋友走入一間茶記。
「喂,啲度都唔差架喎!啲地板立立令唔在講、啲餐牌又全過膠,令你感受到法國波爾多嘅浪漫迷情、加上圍繞身邊啲三部LCD大電視,令你可以盡情欣賞電視啲節目,再黎一個咕嚕肉客飯,都只係78蚊,絕對係超值,一啲都唔cheap!」
之不過對面個女人就唔係咁諗法,聽到入茶記已經成個黑口黑面,睇埋個餐牌直情變哂臉。又話啲度唔乾淨、又話個位逼、又話個電視機好嘈。
我心諗:「法拉利跑車啲位仲窄啦,你係咪唔坐先?成日落蘭桂坊啲吧,都唔會比啲度靜卦,斷估你都唔會拎本雙城記去老蘭啦,你邊有咁文藝呀?」
最後佢講左一句:「Honestly,我覺得食餐飯,每人駛三百零蚊,好基本囉。」我心諗:「你唔洗強調每人囉,其實咁多次你都冇找過數。」我想即刻飛左佢,但結果係佢即日已經飛左我。
悲劇!
自此以後,我曾經以為女人都是這樣,我曾經想過做「一休和尚」算數。得閒有需要就扑下木魚,以此為樂。但估唔到有生之年,仲可以搵到一個,主動同我食麥記嘅女仔。
一個男人要同女朋友食麥記,為咗啲咩?覺得麥記好好食?覺得麥趣飯好爆趣?成年人唔好比咁多幻想自己啦,廿幾歲仔,要拉個女朋友去食老麥,只係因為四個字,「山窮水盡」。
講真,當個女仔提議去食麥記嘅時候,我真係懷疑佢係試探我。但我見佢咁真心,又無妨一試。一坐低,佢就問我食咩,咁就自己行左出去買。我心諗「出事!」
係麥記兵法之中,只要你戰略得宜,一餐飯嘅價格,要超越California Pizza絕對唔係難事。只要散嗌一個扭扭粉,掟個靚彎去隔離「麥café」整杯藍梅特飲,再加一件芝士餅。驀然回首,Order多一客薯條走鹽,雞翼併盤當例牌,真係我慣了傷心,臨尾飄移再外賣多一個開心樂園餐,話要換禮物比細佬。成壇野,已經可以用左你一百幾廿蚊,仲要未買你嗰份。
說時遲、那時快,女朋友已經買咗野返黎,佢最後要嘅,原來只係廿一蚊嘅麥樂雞餐,重無加大、無加三蚊變檸檬茶。個一野,我已經眼濕濕,我想話俾返錢佢,佢仲借啲意話,遲下食好嘢先比我請返啦。我好感動,流下了男兒淚,個時仲要搭緊枱。
女朋友問我好地地做咩喊,我唯有話係啲洋蔥澀眼,真係「一層一層一層的剝開我的心」,但係我當時係食緊魚柳包……個一刻,我終於明白,咩叫感動。女朋友係你唔太惦嘅環境下,主動拉你去食麥記,仲要顧全你嘅面子,唔令你難堪,掛住個笑樣,拖住你隻手仔食薯條,個一下先叫感動。
劉心悠始終會老、陳法拉都有黑面嘅時候、何家淑女你又唔係陳X聰、Angela Baby都開始同人撞樣啦!
男人一生,尋覓到一個肯同自己捱麥記嘅女人時,就三個字。
娶得過。
摘錄自張晨潮文:《男人一生,只為尋覓一個肯同自己挨麥記嘅女人》