洋蔥薯仔炆雞翼

早兩個星期再整「茶樹菇紅腰豆炆豬手」，整左出嚟發覺最好食係啲紅腰豆(食譜請參考「隨意窩」舊網誌，網址見左上角)；

今日整「洋蔥薯仔炆雞翼」又發覺最好食果啲竟然係洋蔥！下次整試吓唔落薯仔，落多啲洋蔥。

我用左新鮮雞翼，我覺得唔貴($5一隻，買$20經已一大碟！人多嘅咪落多啲薯仔囉)，食味一定較急凍雞中翼好食！而且依家雞中翼接近$40一包，用半包都經已廿蚊啦！除非你唔鍾意食雞翼尖同雞翼脾，否則應該用新鮮雞翼整。

通常炆嘅餸都係汁比較多嘅，不過呢啲汁偏肥，我唔會用嚟撈飯；如果唔怕肥嘅，用嚟點蒜茸包同撈飯食都會好好味。

材料：

新鮮雞翼三隻斬件(叫雞販做)，用豉油、豆粉、糖、油醃半天

薯仔一個切件(煮前才切，否則要浸水)

洋蔥一個切件

做法：

一. 將薯仔煎至金黃。(正常係炸嘅，避免薯仔煮爛晒！不過，家庭做，簡單為原則啦)

二. 雞翼下鑊煎至兩面金黃，下洋蔥下同爆炒至香，灒酒。加入薯仔繼續炒一會，下蓋過材料一半的水，下蠔油4湯匙、黃糖一茶匙蓋上煮滾，收慢火炆約15分鐘至薯仔夠稔，下老抽較色。