西芹炒蜆肉

西芹可降血壓，不過，佢始終唔係藥，作為食療，係要經常食先至得！嚴重嘅，就梗係要睇醫生啦！

蜆肉梗係新鮮買番嚟取肉最好，但係我奉行「慳得就慳」(包括時間同錢)嘅原則，閒時見倒有啲食材可以儲存起嚟作不時之需嘅，都會買嚟試吓嘅----好嘅日後咪多個選擇囉，唔好嘅以為咪同佢割蓆囉----都話女人硬起心腸果陣好得人驚架啦！

今次用左早前響「街寶」買嘅急凍蜆肉---大大粒，比新鮮果啲大好多！有睇頭，不過都唔平架，有時新鮮果啲「花蛤」(唔係講年紀呀)都係十幾蚊斤！果次買左一磅左右，接近三十蚊；我將佢分開三份，用嚟炒吓餸，咁即係每次約十蚊。

材料：

西芹     (我買左十蚊)去根切條狀

蜆肉約三兩

薑片、乾蔥片、蒜茸 (我唔食薑嘅，所以祇用薑片起鑊後丟去；

                           食薑嘅咪用薑茸囉)

調味料：

蠔油、生抽、糖、麻油、小許水

做法：

一. 起鑊炒西芹，下少許鹽及水煮至需要的稔度。(我鍾意食爽脆嘅，所以祇下

     一兩湯匙水)

二. 燒油爆薑片、乾蔥片至香，(去薑)下蜆肉及蒜茸爆炒，灒酒，下調味及西

     芹炒勻。