見聞_集_合訂21

50. 世事無絕對

世事無絕對! 呢句老生常談既哲理名言, 確係見地非凡, 唔係我地普羅大眾可以第一時間消化同埋接受! 絕對既另一面係相對. 以術數黎講, 絕對係一, 相對係二! 一既然係絕, 所以無對可言, 古人多數以一呢個數字代表真理; 二既然係相, 所以彼此對立, 基於對立先至會產生左陰陽真假虛實正邪道魔等等通用名詞!

例如圓周360度, 所站既角度唔同, 所睇既視野自然有別. 由於忽略左自己跟對方所處既位置, 從而以自己既角度出發黎批評對方既錯. 以圓周理論而言, 雙方既立場係成立既. 只不過角度唔同, 至有睇既野唔同; 更加會有立場既唔同. 對立, 由此而衍生種種誤會磨擦; 意見, 由此而互訴對方既無理; 導致兩敗俱傷!!

51. 咪當我老襯

時不時聽到敵友之間會講一兩句笑話! 最特別既係一句[咪當我老襯]! 眾所週知, 老襯呢兩個字泛指有婚約在身或已過門完成左程序既親家相見時既暱稱, 隱諭好親近甚至當對方係一家人既意思. 有別於呢種解釋既, 就係當對方係傻既, 可以隨時將對方搵笨, 或者係愚弄黎令大家取笑既對象. 即係視對方係小丑囉.

老友間講呢句話既時候, 純係講笑形式, 並無任何火藥味夾雜係入面. 跟敵人講同樣既一句話, 但係語氣之重, 殺氣之盛, 當然再唔可以視為講笑, 更有可能隨時各為其主下對對方痛下殺手都話唔埋. 撇開呢類嚴肅既問題, 單從朋友間講笑, 確係人生一大快事. 由朋友做到老友好難, 由老友做到親如兄弟姊妹既仲難.

52. 你死咗去邊?

好多時我地同朋友約會, 等左好耐, 對方至出現. 或多或少會好勞氣咁彈出一句: 你死左去邊, 點解搵你唔倒? 呢句:[你死左去邊]真係可圈可點! 佢有兩重意思!! 第一重好簡單, 意思係鬧對方淨話死去邊度, 咁耐先至到, 令大棚人等你一個? 第二重好嚴重, 意思係問緊對方知唔知當你瓜左老襯既時候, 你會去邊度?

係上天堂? 抑或係落地獄? 下世做人? 抑或係做畜牲? 有無神論既人, 都會異口同聲咁反對有輪迴呢件事! 同時亦會堅持相信所信仰既, 就會得到好好既照顧, 安排到生前所想所願既地方去! 其實, 邊個人可以寫包單? 除非係生前, 廣行善事, 大積陰德, 先至有保障死左之後會去邊度! 陰德, 係天知地知當事人知咋!!