洋蔥煙肉炒菠菜

睇見個菜名，有冇覺得奇怪？仲未算奇，奇就奇在呢味菜仲加左提子，係咪有啲不可思議呢？

呢味其實係西菜，加左提子你可能覺得怪怪地，但係怪唔怪又係見人見智，鍾意嘅(特別係小朋友)可能會好喜歡食都唔定。

材料：

菠菜半斤

煙肉四片

洋蔥半小個切粒

黑提子乾一小盒

一. 菠菜切小段。

二. 煙肉切絲、洋蔥切粒。

三. 白鑊煎香煙肉，如油份多(不夠便再加油)加入洋蔥炒至軟。

四. 倒入提子乾及菠菜炒勻(如菜葉多，應毋須加水)，下半茶匙糖(因煙肉有咸味)炒勻蓋上焗一會至菠菜軟身即可。

註：

一. 菠菜同提子鐵質都好豐富。提子乾齋食頗甜，但咁樣煮左反而唔覺得甜。

二. 最好選用超市賣，用嚟整沙律嘅BB菠菜Baby Spinach(鬼唔知呀！貴吖馬。見咁啱買倒啲短腳菠菜，咪整個A貨嚟食囉)

 三. 最近聽營養師講，原來菠菜同莧菜係兩兄弟嚟。菠菜英文係spinach,莧菜係Chinese spinach(中國菠菜)，所以兩者營養價值差不多。