飲食習慣

尋日係同曲友芳芳兩個月一次北上聚會。聚會做咩？除左唱歌有咩嘢好做吖---我又唔鍾意按摩、呢世人最憎係跳舞！

早一晚大操(6月1日出騷rehearsal)，完左去食宵夜，返屋企追劇追到兩點半先瞓，第二朝就北上；可能睡眠不足、加上腰骨又唔舒服，尋日聲線唔好(好攰、眼澀、後來芳芳講我知，我左眼爆左微絲血管，有少少沁血，照吓鏡先知)。

晚飯時，講開大家對飲食喜好---我地四個人。大家年紀都唔輕，所以佢地最主要係食物要稔，其他冇咩嘢要求。

我份人可能細時冇嘢食，基本上食得落口嘅(甚至其他人認為食唔落口嘅)我都食。我嘅原則係食過覺得唔好食，以後咪唔食囉！我唔會試都唔試就唔食。

以前聽人地講過食蝎子。雖然蝎子樣衰，但係我覺得人一世、物一世，如果唔係貴到我食唔起，有機會我都會試。十年前去北京旅行，可惜拍乸唔肯陪我去皇府井行，試食蝎子。最近睇「李純恩大食遊」講到去北京食蝎子，佢同個拍檔食完後表情怪異，最終講左句「脆脆地咁囉」。

嘩！得脆脆地三個字值唔值得試呀？你食日本果啲連埋殼嘅蟹仔零食好過啦！

又聽說：河豚乃天下美味，所以有人寧願冒死嘅危險，都要一嘗河豚。如果你問我，我會覺得反正我未食過、亦唔知佢係咪真係好食(好唔好食各花入各眼)，梗係唔會搵條命搏啦！

不過，尋晚席上我講：如要有朝一日我厭世，可能會考慮食河豚自殺----反正要死咯，咁就不妨一試啦！咁梗係自己呢個冇牌廚師去劏啦。

呢世人有幾樣食材我最唔鍾意食(唔鍾意嘅意思係：有其他嘢食，我唔會食)：

一. 西生菜：基本上我係好喜歡食菜嘅，何解獨唔喜歡西生菜？原因有二。你睇飲食節目，主持人最常講果句係：啲雞好有雞味喎、啲魚好有魚味喎....！你可能覺得佢講緊廢話---雞梗係有雞味、魚梗係有魚味.....錯了？錯在那裡？你唔覺得依家啲雞越嚟越冇雞味咩？同樣地，菜係咪應該有菜味吖？偏偏西生菜除左得個爽字，並冇菜味！呢樣係我接受唔倒嘅----話之你係苦味都好，都叫做有味吖。

二. 冬瓜：同樣理由，我唔鍾意食冬瓜。買冬瓜通常係用嚟煲消暑去濕湯。當佢係藥咁飲，飲佢點都好過飲藥嘅！

三. 桂花魚：會唔會覺得奇？冇法子，有童年陰影。我阿媽當家嘅時候，有一段好長嘅時間，差唔多餐餐都係蒸桂花魚----那個年代，冇活嘅桂花魚；即使有都唔捨得買嚟食啦。桂花魚俾我嘅感覺係又冇味、又稔Bat Bat，好鬼難食！依家街市賣嘅都係游水桂花魚，但係呢幾年我做煮婦，一次都未買過嚟食。

以上講嘅係有得揀我唔食嘅嘢！以下係冇得揀我都唔食嘅嘢：

一.辣椒、麻辣(唔食辣嘢，冇咩出奇啫)

二.薑(唔食薑但食薑汁，雖然怪，但係我食倒薑會嘔，冇理由食啫)

以下係我好鍾意食、但係唔食嘅嘢。點解咁奇，鍾意食、又唔食？

一. 榴槤：好鍾意食，但唔受得！食完有手尾跟，所以咪唔食囉！

二. 芒果：又係好鍾意食，但係對皮膚唔好。

基本上，我係一名果后。以前每日冇生果不歡。兩年前驗身血糖高企(一向都係)，擔心會糖尿；加上我阿媽入左老人院後，買生果得我一個人食，放到壞都食唔完；有時為左唔想嘥更加會食多左！原來生果果糖好高，呢兩年我食少左生果體重減輕左。

所以，個人飲食習慣，係要隨個人喜好、體質變化而不斷調較嘅！

尋晚差不多食完飯，有位仁兄拎左碟點心過嚟問我食唔食？望真啲，原來係芳芳同我嘅舊同學，冇見左兩年，佢因工作關係，好少北上操曲。咁都撞倒，反正我地都食完飯，於是同芳芳過檯傾左成個幾小時，另外兩位朋友自行打道回府。

返到屋企都成十點(往時八時經已回府)，洗完白白、急急腳上床瞓，睇吓今日咩嘢環境----隻眼駛唔駛睇醫生？

一覺醒來，好彩紅點淡左好多啫。