倒瀉籮蟹

「倒瀉籮蟹」的意思，即是手足無措、手忙腳亂。

尋晚上海工作嘅姪女whatsapp我：「姑姐：端午節快樂！」

我whatsapp左尋日出「騷」，曲友肥仔響第一行偷拍嘅相俾佢：

姪女：「今日嘅？」

我：「今日出完騷，生左兩個BB。」

姪女：「嘩！件衫唔錯。」(冇嘢值得讚、就讚你衫靚、妝靚....我明嘅！)

我：「順產，母子平安！呢件衫第三次著啦，膊頭個袖係我今次配花邊加上去。」

姪：「哈哈！一定要cover(遮蓋)吓。」(幾抵死！)

講番點樣倒瀉籮蟹先。尋日日場唱第三同第九兩首，開兩點，一早約左化妝小姐一點開始化妝；如果平時我寧願早啲化好等，但係因為仲要唱尾曲，太早化好個妝、真係溶埋都未出場(年紀大加上天時暑熱)。

心諗：上次搵佢化都係用左個半小時，咁第三首即係三點、有兩個鐘點都夠啦！誰知化妝小姐遲到十五分鐘、跟住聽倒有人講第二首雖然係對唱歌，但係得十幾分鐘----死啦！咁咪少左半個鐘頭化妝？

化妝小姐嚟到，我二話不說叫左要快！誰知越急越死---上次貼眼皮膠紙一次便攪掂，今次貼左四次先得。係咪心急如焚吖？

結果：冇時間試咪、唔記得左拜華光(後來叫「哎呀細仔」代勞)、冇時間同拍檔溝通吓、冇時間睇吓點走位.....唉！從未試過咁失敗架。

化完妝，化妝小姐要出去食午飯；佢問我幾時返來轉妝？我答：個「騷」去到六點完，我唱尾曲，預五點廿分前攪掂啦，化妝小姐告知佢四時三十分回來。

唉！人算又不如天算呀，前面三首單支都較正常時間快左，結果又攪到....

出場啦....個頭仲係差啲差啲，我同化妝小姐講：「我收貨啦！」攝影師又等緊我拍照、拍檔又等緊我出場、仲未得閒溝通吓，真係打天才波呀！

從未如此狼忙過....因為我做事一向有早冇遲，今次真係.....

好彩！即使如此，出嚟嘅效果都....

「哎呀細仔」夜晚打電話嚟，佢話尋日做得好辛苦、不過好開心(佢係攪手)！佢果陣聽緊我同「哎呀家嫂」出騷唱果兩首歌，佢覺得好滿意、音樂又玩得好靚！

散場時，與幾位好友相約於大堂等候。當時有位婆婆走埋嚟，雙手握住我對手同我講：「好多謝你呀？」(奇！佢多謝我咩嘢呢？)

我：「啊！多謝你捧場至真。你攞左禮物未呀？」(細仔話憑劵每人有米兩斤同餅食)

婆婆：「攞左啦！多謝多謝。」

我：「小心行呀！」

每次出騷都有很大壓力，今次對手強(我「哎呀家嫂」)更加唔可以輕敵！不過，總算順產啦，下次八月尾同「哎呀細仔」出騷唱「帝女花之庵遇」。