日久失修

兩星期前一單罕有室內意外，我跌傷腰骨，從未試過PK後不能自己起番身----以前PK，都一定會用手、用腳去防止跌傷重要部位，但今次唔係向前仆，向後坐，仲要低左一級，雙手都冇任何嘢可以扶持！今次發覺原來見唔倒血先至得人驚。

亦從未試過跌後覺得頭暈眼花，當時要兩個人先扶得起我(人肥冇藥醫)；食左粒藥(好似叫做救心丹)、抖左十分鐘先冇暈，繼續唱埋兩首歌(仲有一口氣都要唱埋佢、否則攪串人地個派對架)，然後急急去睇醫生。

X光照倒腰骨彎左、有一節扁左，西醫估計唔倒係新傷定係舊患，寫紙叫我做物理治療。

物理治療師話我啲係舊患，當然今次跌倒有影響；依家做左兩個星期物理治療，總算係漸入佳境，可以唔駛去得咁密，自己多做啲拉筋動作。嘩！當時幾驚影響我上星期日果個「騷」呀----因為深呼吸都痛、難道用個肺嚟呼吸咩，我個肺淨係用嚟講嘢架咋！

今次事件教訓我、同大家，唔好以為跌親起番身冇事，就係冇事；年輕果陣可能唔覺得有事，老左你就知！所以第二時PK，最好都係照吓X光，有咩嘢事都可以病向「錢」中醫吖！

姊妹們好多時去超市買嘢，唔經唔覺買多左，有陣時自己拎得倒、又唔想等人送(又或者買唔夠可以送貨嘅銀碼)，自己走去拎，久而久之傷左筋骨都唔知。我都係咁傷左，十幾廿年前左手麻痺，西醫話係網球手、醫院睇話係神經線發炎---話咩嘢都好啦、總之係醫我唔倒！最終係睇中醫物理治療治左標，跟住五年後又番發，又再做中醫物理治療好番。可能自此之後，我去超市預左會買得多同重嘅，都會帶手拉車去，近呢十年先冇再翻發。

講咁多廢話(我都話我個肺淨係用嚟講嘢架啦)，祇係希望大家引以為戒，唔好以為好多傷痛係少事，久而久之就變成大件事！

人地話：年紀大、機器壞！一件機器除了因長時間使用而出亂子之外，日久失修都變得嚴重！政府成日講：大廈要keep住做維修，先至可以住得安心同保值，人都係一樣！

祝大家身體健康，唔好食咁多糭呀---特別係有痛風嘅朋友！