煎牛仔骨

牛仔骨係易整又受歡迎嘅食材(唔食牛肉嘅就冇得講啦！喜歡食牛肉一定喜歡食牛仔骨)，價錢並不便宜；不過，依家牛肉咁貴，間中食吓冇咩所謂啦----好似我咁，好又一餐、唔好又一餐！

材料：

牛仔骨     解凍後切件   (我買果包，三條牛仔骨，四十幾蚊)

洋蔥一個  切絲

一. 牛仔骨用生抽、胡椒粉略醃。

二. 先用油炒熟洋蔥上碟(落唔落鹽自己決定，我食得淡，而且牛仔骨有汁，所以我冇落)。

三. 在牛仔骨上洒上生粉才煎，煎完一面反轉另一面；灒酒，下蠔油茨(蠔油、生粉、糖、水)炒勻，上碟。

註：

一. 牛仔骨同牛扒一樣，唔駛煎到十成熟；如果個人怕生，當然可以煎熟佢食。

二. 用泡油用法會更嫩滑---不過一為健康、二為荷包(油唔平架)，所以我用煎嘅方法。兩者取其平衡，當時可以用較多少少油用半煎炸方式。

三. 煎前撲生粉係要鎖住肉汁。

四. 汁冇落生粉，因為牛仔骨已有生粉。