少年得志

據報紙講有少年廚神之稱嘅劉嘉麟因生意及借錢賭波失敗下燒炭自殺身亡! 享年三十歲, 應該是如日中天大把前途, 居然走上絕路, 遺下妻兒, 實在令人深感惋惜難過! 人生際遇無常, 邊個可以預知未來又能夠趨吉避凶? 古人話: 寧可大器晚成, 唔好少年得志! 由於少年得志, 容易因為一時成功就會

目中無人語無倫次! 何況, 當一時僥倖成功, 身邊嘅人會講盡恭維而又唔真實嘅話, 當事人一旦照單全收, 就會陷入自我催眠狀態, 自以為人哋嘅恭維全部真心全部實情; 自以為天下無敵; 自以為同行無一喺自己對手; 自以為從此平步青雲呼風喚雨; 從未想過自己有幾多斤兩實力; 從未想過現有優勢可

唔可以無限量伸延; 從未想過自己會唔會被勝利沖昏頭腦, 從未想過自己會唔會從高峰跌落嚟打回原形. 所以身心靈全麻醉在意氣風發入面, 對身外實際環境未必睇得透徹. 繼而任性行事, 未有料到原本掌控在手嘅嘢會突然間失控, 就會覺得個天玩緊自己! 最後跳唔出面子呢一關, 順理成章咁走上絕路!

好耐之前, 筆者曾經提到過我哋一定要承認自己喺平凡嘅人, 唔好妄想自己喺超人! 我哋可以從冇到有咁, 咬實牙關去拼搏去流血流汗咁打出自己嘅江山! 但我哋就然冇勇氣去面對失敗由有到冇咁打回原形! 我哋更接受唔到日後遭受冷言冷語嘅刺激! 卻忘記咗留得青山在, 那怕冇柴燒! 一日未死仲有機會!