利寶閣

美國個大佬、大嫂和上海嘅姪女一家上星期一離港去北海道玩五天，尋晚夜機返港，今日傍晚又飛去上海玩一個星期，然後打道回美國。

今日姪女約我出尖沙咀飲茶。原來去日本冇Wifi用，要響香港租用；今日走之前要去尖沙咀還同交租，因此約去尖沙咀The One飲茶。

一如既往，雖然約左十二點四十五分，我十二點十五分經已到左，確定左酒樓叫「利寶閣」(雖然嚟過幾次，都係講唔出咩嘢名)；低層有間叫「明珠閣」。原來大佬一家都到左果度，姪女問：「邊間好啲？」

我：「唔知！我淨係食過一間。」

姪女：「邊間個景好啲？」

我：「咁梗係「利寶閣」啦！十七樓海景；「明珠閣」係彌敦道街景。」於是一行四人上左「利寶閣」。雖然當時滿座，但亦祇等左十分八分鐘便有位！

企響度阻住個景果個咪我大佬囉！ 

雖然我嚟過兩三次，但係今次叫果啲食物，同以前果啲全部唔同：

咖哩魚旦豬皮---魚旦好味(我都係覺得啲咖喱汁辣左啲，不過我大佬同姪女係無辣不歡嘅，啱佢地)，同街邊嘅質素不可同日而語！但係姪女覺得街邊果啲咖哩汁好味啲，呢度啲似印度咖哩！我答：「人地就係要俾你覺得兩者有分別囉！」

拆肉泥鯭粥 $48---好少機會響酒樓食倒泥鯭粥架！食味唔錯，當然，我都係鍾意灣仔克街「靠得住」嘅泥鯭粥：以我一個唔鐘意食粥嘅人，都會由胡忠大廈行九條街去食，差極都有個譜啦！

魚滑魚湯菜苗  $48----咁普通嘅嘢，都冇咩機會失手啦！

XO醬腸粉  ---以前XO醬有分辣同冇咁辣兩種，依家全部都係得個辣字！我試第一舊，講唔出係辣還是熱；攤左一陣再試，對我嚟講都係辣左啲，不過味道唔錯！用嘅器皿係保溫嘅，過左好耐啲腸粉仲出煙。美中不足係，呢個盛器同杯碟都有啲崩左，大煞風景。

蜜汁叉燒飽   $19 ---傳統嘢， OK啦！

脆皮蝦餃   $10一隻---姪女見個名咁得意，叫嚟試！問我好唔好食？我答：「咪蝦餃一隻囉！」叫做未食過、食吓囉！一般蝦餃四隻$38，佢炸過每隻貴$0.5。又唔可以話唔好食，不過拎到嚟要盡快食，因為祇係稍微炸吓，凍左可能會靱！

脆皮牛坑腩  $52---用日本青芥醮嚟食，我梗係唔會醮啦！至於牛坑腩，因為係炸嘅，所以食落比較乾，唔得juicy；大佬都係咁講。

燒汁木魚釀茄子   $31---我唔覺有嘢釀響度，呢個價錢絕對食唔過！

鮮忌廉香芒卷  $26 -- 食味OK，不過啲忌廉食落唔似忌廉，係睇番個名先知係忌廉！

飲完茶，佢地一家「打的」回酒店取行李去機場，匆匆結束香港之旅！