煎釀彩椒

行經「大昌行」，見有一包三色彩椒，賣$13.90. 話平唔平、話貴唔貴---因為菜檔好多時三色椒任揀三個$10. 不過，貴四蚊睇吓會唔會好食啲！

材料：

三色椒各一   (我一次用唔晒，因為黃椒和綠椒較大隻，我祇各切了一半用)

調味鯪魚肉四兩 (人多嘅，用晒一包彩椒加半斤魚肉)

蒜茸三粒      (唔鍾意食蒜茸，可以減少、或切片)

原粒豆豉一湯匙略洗

一. 彩椒洗淨切件，撲上薄薄一層生粉。

二. 四兩魚肉祇能釀上薄薄一層。煮前在魚肉上亦洒上薄薄一層生粉。

三. 燒油少許，放上彩椒(魚肉向下)煎至魚肉略金黃，下蒜茸及豆豉，灒酒爆炒，洒少許水(以防魚肉裡面未熟，讓水將魚肉蒸熟)。

四. 下芡汁(蠔油、糖、水、生粉)炒勻上碟。

註：

一. 喜歡食辣嘅可加入紅辣椒、甚至用尖椒釀。

二. 再簡單一些，超市有現成釀好的椒、茄子及豆腐泡賣。如喜歡食淡嘅，買回家煎熟便可；不過，我覺得蒜頭豆豉與魚肉很夾---我都唔食豆豉，祇係要佢嘅味！我試過買現成嘅，加個蒜頭豆豉芡，唔錯架。

三. 唔知係咪心理問題呢，我覺得佢好食過$10三個果啲！