姐妹們的終身事業---減肥(下)

上回講：我年青時減肥係為左可以買倒平價嘅日本時裝穿，依家年老便為了怕左三位高先生。

可是，眼見不少女士，看上去一點不肥，有些還瘦到皮包骨，依然嚷著要減肥。問題便來了：夠竟何謂之瘦？何謂之肥？林燕妮曾經寫過：「當你擁抱一位靚女時(撇開樣貌不說)，會有種溫香軟肉抱滿懷嘅感覺。」因此，皮包骨！好似攬住堆柴咁，唔合格啦！但係如果超重，果種壓迫感一樣令人吃不消。我當年在學堂接受輔警訓練時，有一位教官閒談時跟我說：「男人天生喜歡「的式」形女性，因為這些女士睇落弱小，男人英雄主義，喜歡保護弱小。」話又得說回來，女人生得細粒唔等如係皮包骨架、可以係骨肉均勻嘅！

其實肥瘦冇標準，楊玉環與趙飛燕「燕瘦環肥」，正是咸魚青菜，各有所愛。趙飛燕祇是身輕，不等如係皮包骨；楊玉環祇是身形較豐滿，亦不等如佢肥到好似隻死豬撻響度咁，係咁唐明皇都冇胃口啦！因此，個人覺得如果肥得嚟唔會俾人一個好難睇嘅感覺、身體亦冇因此而出現健康問題，便一切也不是問題，反正我地係為自己而活啫！

唔好以為瘦一定健康喎！瘦得過份可能又是貧血象徵。

大家認識的欣宜，自幼便受到肥姐的溺愛(佢冇錯嘅，為人父母愛子女係正常架)，別的不知，但有報導：由於欣宜喜歡吃鮑魚，肥姐便每天給她鮑魚作早餐，其他的更不用多說了；久而久之，當年欣宜的外貌、體重，大家有目共睹亦心裡有數。十年前，肥姐終於也察覺有問題，於是請張玉姍替欣宜減肥，成功由二百多磅減至一百多磅；收身後的欣宜外貌大家亦有目共睹，無須多講。

我以前減幾磅都好辛苦，可以想像欣宜的減肥過程比我辛苦多倍----我一向細食 ，祇是不食也肥(因為工作，經常冇住家飯食)！佢飲慣食慣，要減食、要做機(哈哈！終於有樣減肥方法我未試過---貴囉！張小姐又唔贊助我)、仲要時間(聞說要天天做)，都好辛苦啫！

減過肥嘅人都知，要肥十磅話都冇咁易；但係要減十磅難過登天！減完要保持得住體重比登天更難！

欣宜呢幾年經已放棄左要保持身形呢個念頭，可能佢識啲男友大多是外國人，外國人個個肥屍大隻，同佢比可能係蚊比同牛比；亦可能佢有的是錢，男友志不在此；可能....

我唔認同啲人係又減肥、唔係又減肥，你可能會話：你都幾十歲咯，更係冇所謂啦！你錯啦，我都好注重外表架！

你睇吓呢啲相，你點睇？

肥姐都肥架，但係你唔會覺得佢難睇(佢仲輕盈到可以跳芭蕾舞添)、或者見倒會不安囉！肥姐走紅其實係一個異數，當然佢本身努力和時勢，亦是其成功的因素。當年一個長壽節目「歡樂今宵」不知紅了多少藝員；否則，以佢咁嘅身形，冇可能套套劇搵個角色俾佢做！依家無線夾硬嚟，差不多隔套劇便安排一個肥人角色，真係睇到令人不安架！

我再一次強調，減肥好多時係為左健康著想，並非單純因為外表；當然，如果肥到某一個程度(果陣真係令人見倒都不安架)、特別是要當藝員，更加不能不注重外表(如果唔想嘅咪唔好做藝員囉！唔好虐待觀眾至得)！

講完啦！有冇覺得被騙？都冇講減肥方法！我有嘅、減肥就唔會變成終身事業啦；正因為減極都唔成功，才會終此一生都要為體重而努力啫！

祝大家不論肥瘦，身體健康！