多士工房Toast Box

尋日朝早因為要空肚去佐敦做檢查，九點半鐘攪掂左搵掟食早餐；諗都唔駛諗，就去就近嘅「多士工房」。

未食過佢嘅早餐，反而我之前推介過佢嘅「啦沙套餐」；不過，食味經過年多亦差了---辣味保存、香味減！冇法子，將貨就價！不過，我鍾意佢嘅奶茶，有花香味！廿年前響香港仔一印度餐廳首次飲過有花香味嘅奶茶，其後便祇有這裡的奶茶有花香味；加上細杯---啱我呢啲應該戒飲奶茶、又戒唔甩嘅人囉！

其實佢冇正式早餐。早餐同下午茶係一樣嘅，我叫做個超肥早餐：西多士配奶茶，煎雙旦係跟餐嘅，唔食都唔得！

有次我去呢度食下午茶餐，唔記得叫左咩？祇記得叫左多士同奶茶，侍應問我要唔要雙旦？我答唔要，因為食唔落。侍應告知，我咁樣叫係唔抵嘅，不過我堅持，佢都冇法！

我心諗：唔要雙蛋可能較要埋雙蛋祇係慳得一蚊，但係我真係唔想食咁多蛋吖馬。

其後計吓條數，原來唔食雙蛋仲貴兩蚊---做左笨婆添！

既然係咁，食唔落都叫個餐啦！果杯奶茶仍然好飲。

佢呢度整多士通常會幫你切開九件(唔係九碌)，另插上竹簽，都幾細心。今次叫西多，沒有如一般茶餐廳咁中間夾花生醬，飽邊亦有點硬！而且，我唔太喜歡佢落左好似加拿大楓葉糖醬嘅味！

至於雙蛋，星加坡人喜歡食較生嘅，但我叫了熟蛋---方便我拎走兩個蛋黃，但係熟蛋過熟，有點硬！

整體來說，除左杯奶茶，其他嘢乏善足陳(註)！

呢個餐，盛惠廿九個大洋！

註：

乏善足陳：
【注释】陈：述说。没有什么好称道的，叫做「乏善可陈」。
【用法】凡是用来表示一件事物没有什么优点可以提出来称道，就可以说是「乏善可陈」。用此成语时，含有不太满意的意思。