蟲草花蒸雞

「金針雲耳蒸雞」大家都熟悉。近年流行食蟲草花，我響酒樓食過「蟲草花蒸水魚」。

蟲草花一般用嚟煲湯，煲完啲湯金黃色，用蟲草花蒸雞，蒸熟左碟餸亦較為深色！但煲完湯好多時食唔倒蟲草花，但係用嚟蒸餸、基本上可以食番晒啲蟲草花。蟲草花有少少特殊香味，口感幾爽！

材料：

雞半隻斬件  (我通常去街市買新鮮雞翼或超市買冰鮮雞翼整。咁啱見惠記有一盒5隻斬左件嘅走地雞翼，$29都幾抵，於是買嚟整，懶得入街市)

蟲草花少許浸軟揸乾水

紅棗8粒去核切細

冬菇仔幾隻浸軟揸乾水切絲

雲耳少許浸軟飛水揸乾切碎

一. 將所有材料放深碗內，下薑汁、酒、生抽、蠔酒、糖、麻油及粟粉(醃料多少自己決定，視材料多少)拌勻醃最少一小時。

二. 臨煮前將材料鋪平於碟上，蒸十分鐘。

註：

一. 除左少少麻油，我冇再加其他油！我強調所有材料都要揸乾水，否則蒸出嚟會水汪汪---除非你想碟餸多汁！如果係咁醃料要多啲，否則會淡左。

二. 我第一次買惠記嘅新鮮雞，冇諗過唔錯喎----蒸熟左連翼上脾都好滑！