是輸？是贏？

一位退休警務人員朋友，尋日約左我與舊同事竹戰，順便派貼：佢兒子下月做老襯！

戰場設在東九龍---梗係要避開塞車嘅地帶啦(我地都係君子)！三檯麻雀共十二人，因為要揍夠三檯人，所以有一些人士我並不認識！

平常竹戰，唔駛講我地都會自動走位---女嘅一檯、男嘅一檯：一檯打細啲(咪我果檯囉)、一檯打大啲。誰知尋日去到先發覺改左遊戲規則：未見官先打八十大板----入場費每位一百大圓！用來作甚？佢地玩麻雀王大賽，入場費收左千二個大洋，打完結果冠軍有六百蚊獎賞、亞軍四百、季軍二百。

亦因為咁樣玩法，所以全部都係用一式一樣嘅玩法，同時每四圈便要重新抽簽決定對手！唉，早知如此，我就唔上當啦----我一世人冇橫財命(所以唔會因貪錢而做禍國殃民嘅事)，每次打麻雀都預左輸(事實又係：十居其九個半都係輸)，所以同打慣打熟嘅人玩，輸幾多有數得計----捐錢事少、輸錢事大呀！

哈哈！尋日打左十二圈，我居然贏錢喎(仲食左鋪十三么)：結果贏左一百八十個大洋！但係我入唔倒冠、亞、季軍(好似係梗頸四)，結果....扣除一百蚊入場費，扣埋一百四十蚊娛樂費，我係贏定輸呢？

所以，我都係鍾意跟我果幾位豬朋玩。我地贏左抽水，食晚飯嘅錢用水嚟俾，用剩嘅大家分---呢個好處係打麻雀輸左都係自己食番落肚，輸左分番水又輸少啲！

前者有錦上添花之嫌----經已輸錢咯(大輸家輸左七百幾)，仲要俾入場費同娛樂費：傷上加傷！