羊腩煲
2014/11/12 18:14:47 網誌分類: 食譜
秋風起,食臘味!一來我唔食臘製嘅嘢、二來依家都立左冬咯,一於食羊腩啦!
急凍羊腩係數月前響「大棧」買嘅,一包一磅。買左先醒起果陣天氣都開始熱咯,無謂食羊腩啦;呢幾日天氣稍涼,咪醒起佢囉----好彩咋,原來差不多到期啦!
材料:
急凍羊腩粒一磅飛水
馬蹄數粒略拍
冬菇仔幾隻浸軟揸乾,水留用
薑幾片
蒜茸5粒
南乳一小磚,用少許酒搓爛開稀
燒油爆薑片、蒜茸及南乳,下羊腩、馬蹄及冬菇仔一齊爆炒,灒酒,下過面水(連浸過冬菇的水),糖及生抽煮滾,收細火炆至羊腩稔。
註:
一. 出街食羊腩煲,通常連埋爐上,送生菜自己灼熟食。自己煮,就無謂擺個爐上檯啦!相中所見,生菜係未煮嘅---我淨係用油鹽水灼熟佢,食時淋上羊腩汁(所以汁要多,我亦冇埋芡)。
二. 南乳每磚大小和咸味不同,要自己試味;南乳落得多、糖亦相應要增加,不合健康原則!不過羊腩呢啲嘢,都係偶一為之,滿足吓口腹之慾算啦。
三. 一般煮羊腩煲會落埋炸枝竹,但係我唔想整咁大煲嘢!屋企人多、又喜歡食枝竹嘅咪加落去一齊炆囉!
四. 呢種羊腩唔錯,好容易炆稔。
我唔食南乳,用磨鼓,勁鍾意枝竹,不要炸果隻,浸夠時間,食時才落。薑同蒜一定要多。