女有出頭天！

維修巴士並非男士專利，女士們也可「擔大旗」﹗年僅廿二歲的謝穎楠最近成為九巴成立八十一年來首位女見習工程師，首兩年要落手落腳到維修車廠從基本功做起，體重僅九十多磅的穎楠，弱質纖纖，拿起重型維修工具或零件時頗為吃力，為應付新工，她一反潮流努力增磅提升力量，現時坐巴士時也刻意揀選後排座位，聽聽引擎聲，務求更掌握巴士結構。

今年畢業於中文大學機械與自動化工程學系的謝穎楠，參加了九巴見習工程師訓練計劃，今年八月入職，首兩年先要到各車廠學習維修引擎、波箱，車底盤等。一般女孩子都渴望找一份環境舒適及可以「扮靚靚」返工的辦公室工作，但小妮子卻一反傳統，她說，小時志願是做科研，喜歡較實務性的機械，加上小時與兄長一起砌模型，而兄長現時又從事汽車維修，因而對維修增添興趣：「想做啲平時少女仔做嘅嘢，突破自己。」

現時穎楠在荔枝角車廠實習，由於不少維修工具及零件也相當重，對於不足一百磅、身高約一米六的她頗為吃力，故要增磅，「食多碗飯」。入職前，穎楠嫲嫲曾擔心她會否「畀人蝦」及危險，而她本人亦擔心被維修師傅嫌棄自己「細粒」及「阻頭阻勢」，幸對方都很願意耐心教導。雖同事們屬全男班，穎楠反而獲得優待，笑言：「粗重嘢多數男仔做」。

--------------------------------------------------------------------

記得我初踏足職場時，男女並不同工同酬(梗係女人人工少啲啦)，有一些工種係唔受女人玩嘅，包括我曾經做過嘅幾份工。

何解？當時政府認為有些工作，男人會較女人好：如要與人溝通、要輪班工作、要應酬、要體力勞動、要登山涉水.....

所以，那時候，女人要有人賞識，其實好難：因為那時差不多百份百嘅上司都係男人，心裡面一早有那種先入為主的感覺：女人好多方面都不及男人！

我打第二份政府工，因為經常要到不同地方工作、亦要接觸金融界，所以最初亦是以男性職員為主，不過，我有一兩位舊同事(有男有女)在該部門工作。一次該部門招聘員工，我的舊同事叫我應考(當然必須經已考獲某些專業資格)。

面試那天，三司會審；當日問了不少問題，自問亦答得幾好，誰知跟住一條問題，要我答四樣同某樣嘢有關嘅---我搜索枯腸，祇答倒三樣！正是面有難色，忽然眼尾見最倒開果位面試官員隻手響椅下做左個動作；噢！(就像蘇東坡一樣，一動作驚醒)即刻答啱左：其實人有陣時好衰(我又係講自己啫)，成日鑽牛角尖，其實個答案好簡單(所以主考官都相信我冇理由唔識囉，佢祇係幫我一腳啫)。

其後我果兩位舊同事分別致電給我，告知佢地肯定我一定已被取錄，因為當日最高級位主考官返寫字樓跟啲女同事講：今日見左位女士，目光凌厲(差在未嚇死佢地)，我請左佢返嚟看住你地班小羔羊啦！

我的舊同事聽佢講嘅形容詞，肯定果個係我！結果當然講中啦。

當時，我正在其中一個紀律部門做文職工作(不過，我都相信我已獲聘之前應徵那份工，祇差在未收倒正式公文)；又咁啱果個部門嘅紀律部隊又請人。

我果陣祇係文員，上司才是紀律部隊。當時有兩位上司都分別叫我申請果份工(佢地兩個都會係主考官)，佢地分別同我講，祇要我去見果份工，取錄應該冇問題！

哈哈！我都算衰啦(可能因為我幾肯定另一份工經已OK啦)，我同佢地講：依家招聘果份工要輪班工作，唔啱我！如果係高一級果份就有商量。

佢地即時面有難色：果份工冇得直接聘請，要從低做起，逐級升上去喎！

我：咁咪拉倒囉！

最後，咪去左做之前果份工囉！

做左唔夠一年，又身痕啦！做咩嘢？又考第二份囉。

呢份工都果陣時都係好少請女人做：因為要戶外工作，亦經常要接觸唔同階層嘅人，所以政府認為男人較勝任；我嘅前輩師姊證明左，政府係錯嘅，所以其後即使男女比例唔係女多於男，我相信都一半一半。

那一次面試(政府工一定要通過筆試，才會有得面試)，亦是三司會審，其中一位主考官是外藉人士。

面試的貼士：如果會面時間超過廿分鐘，獲取機會都幾高---如果佢地覺得你唔得，都懶得嘥時間與你搭訕啦！

果次傾左十五分鐘後，那位外藉主考官問左條有關剛發表一份白皮書內容(果樣係全新概念，雖然預左有機會問、亦一早咪左書，但係內容都祇係一知半解)，初時都答得幾好架！誰知越問越深入。心諗：死啦！就嚟冇嘢好講啦。

好彩！講吓講吓、成個面試都超過三十分鐘，最高主考官叫停啦。

見完出嚟，真係輸左一口涼氣呀！

最終又成功左，半年後竟然同外藉果位主考官同一寫字樓、仲要打對面坐。哈哈！你仲唔死？我梗係鬧到佢發瘟啦：咁大整蠱？差啲問到我口啞！

答：我唔係整蠹蠱你呀，我諗住幫你咋！我見果個咁偏門嘅題目你都識，咪繼續問落去囉！

我：我唔理！罰你每日請我飲杯奶茶。

咁咪出事啦！從此上左奶茶癮。飲左幾十年，依家醫生要我戒呀。

經過幾十年，我除左係被考果個、亦多次做考人果個。綜合我嘅經驗同埋其他人嘅經驗，其實響面試嘅時候，女士嘅表現都較男士出色：不知何解？女士在面試時，表現都比較啖定。所以，如果在沒有偏見的情況下，女士在面試時大都佔優勢。

大家又唔駛擔心，咁梁同學啲咁嘅人都考倒咪弊？你放心啦----佢啲英文咁屎，佢過倒筆試果關咩？佢過倒查家宅果關咩？佢副尊容，過倒面試果關咩？我意思唔係表示面試係以貌取人(識我嘅都知我係樣唔靚、身材唔正架啦)，但係望落去都要似番個人樣先得架！