「港鐵」果真是有心人

報載：

行人天橋變「食物橋」

西港島線開通前經過工程人員多番檢查，但仍避免不了「蝦碌」場面出現，香港大學站一部連接行人天橋的電梯顯示屏，竟將行人天橋的英文「Footbridge」串錯為「Foodbridge」，行人天橋變成了「食物橋」，貽笑大方。

尋日響Facebook睇倒呢個報導，第一時間諗倒：「港鐵真係唔話得，招呼咁周到----知道香港大學同學嘅英語水評係咁上下，就住佢地寫出咁嘅英文。」好嘢！我俾左十個like佢架。

唔係咩？言語主要係用嚟溝通嘅，你寫得幾高深都冇用架，要睇果個、用果個人睇得明先得！梁同學係港大學生代表，咁港鐵就住佢識睇嘅英語嚟表達有咩嘢唔啱先？

話時話啦，因咩嘢鬼「無線」新聞又會咁啱得咁蹺響港鐵搵倒梁同學嚟接受訪問呢？架車冇其他人呀？抑或「無線」時運低，淨係睇倒佢？又抑或其他人都唔夠佢上鏡呢吓？

今日再睇報上同樣報導，除左上面嘅想法，我諗多左兩樣嘢(你真係諗多左啦)：

一.  可能寫呢啲路標俾人做果位仁兄/仁姊都係「港大」畢業生，所以佢心裡面真係相信「天橋」英文係「foodbridge」；

二.  可能果位仁兄/仁姊唔係唔知道「天橋」英文係「footbridge」，祇不過佢見呢班所謂大學生唔好好讀書，淨係識得叫口號！所以語重心長、用心良苦，告知佢地果條天橋、你地行過去入到大學俾心機讀書，將來就「搵倒食」嘅意思。

港鐵：我今次要俾無限個like你呀！