花旗參花膠煲鵪鶉
2014/12/31 14:46:12 網誌分類: 食譜
今天是2015年1月1日,新年新開始,祝各位網友新年快樂、身體健康、豐衣足食!
新年第一日,一於食好啲、食豪啲啦!呢個湯對我嚟講,好豪架啦:
材料:
法國鵪鶉一包兩隻解凍開邊飛水(切記要去內臟)
浸發花膠4兩
乾螺頭2兩浸一會飛水
圓肉十多粒
花旗參20克
圓肉20克
金華火腿粒50克飛水
陳皮一角浸軟
薑數片
煲滾適量水,放入所有材料,待再滾收細火煲3小時。因為有金華火腿,可以無需下鹽調味。
呢碗湯連湯渣就係我今日嘅午餐:
我覺得呢煲湯很貴,因為:
一包鵪鶉$68
四兩花膠點都要過一百(我買二千幾蚊一斤花膠自己發)
花旗參(我用原條參,唔駛錢---我屋企最多係花旗參!大家都知有親友響美加就成日收倒呢啲禮物。我唔駛錢啫,唔代表便宜架)
螺頭--相對嚟講,我覺得螺頭乾好味過急凍果種。價錢當然絕不便宜:我買澳洲螺頭乾,$68四兩,我用左一半,即係$34(同一間鋪,本地螺頭乾$98四兩)
圓肉都唔好以為便宜,依家響街市買係以四兩嚟標價架!
金華火腿--大家都知算係高檔嘢啦!不過我又係唔駛錢:我姪女每次響上海落嚟都會帶一包俾我:我食都食唔切。
所以,有數得計,成煲湯以我嚟講好貴架!
註:
一. 呢種鵪鶉除了用來煲湯外,煎炒煮炸一樣鮮嫩。它的好處是油份少,即使冇去皮,煲出來的湯很清:相片所見的湯並冇去油。如果用雞煲,即使去了皮還有很多油,需要隔油才飲得。
二. 花旗參用的份量不多,所以祇有少許甘味,小朋友應不會抗拒。
三. 因為用了螺頭乾,所以要煲三小時,吾則唔夠稔同出味。
哈哈!原本寫左听日出。
今夕是除夕!
可以想像得到有幾好味了! +1
新年快樂!身體健康!福樂滿溢!
我都鍾意飲。
好味,我鐘意飲。