冰室

今日個網又鬧情緒啦：寫完出唔倒兼且成篇冇左！再寫有啲相又上載唔倒。真係俾佢激C！

上次與幾位「豬朋」響屋企竹戰後食完晚飯，我送佢地出去大街嘅時候，見倒樓下間茶餐廳旁邊一間蚊型鋪正在裝修(前身賣魚蛋牛雜小食)，隱約見倒「冰室」兩字。

我跟豬朋講：「隔離間茶餐廳早、午、晚都排長龍喎(咁即係好受歡迎啦！不過我未幫趁過。何解？我最討厭要排隊)，佢以為可以搶倒隔離啲客咩？」

豬朋T：「呢間都係隔離茶餐廳開嘅，諗住食啲另類啲嘅嘢。」佢外母住響附近，所以呢頭啲情況佢好熟悉。

隔不了多久，此冰室開業了，原來佢就係以「冰室」為名。我都話佢蚊型鋪啦！全鋪得廿四個坐位。

鋪仔雖然細細，裝修以白色為主，尚算雅致(臨近新年，所以加左啲新年裝飾)：

我最欣賞佢牆上用黑白花奶罐整成棵「花奶樹」，幾有創意：

當然咁細間鋪，唔可以請太多員工，食物亦唔可以太多元化，餐單較簡單：早、午、晚同常餐都有----早餐約$30、午/晚餐約$45。較茶餐廳貴。

早前，我在網誌「環保V現實」講過有餐廳改用紙杯碟，咪係講呢間囉！可能環保人士會認為佢唔環保，杯葛唔幫趁佢！但係有批評、都要有可行建議至得架：淨係識拉布，有用咩？除左阻住個地球轉之外。

基本上，佢整嘅食物都算唔錯：「香蒜包」係我嘅至愛，外鬆脆内軟！差不多主餐都會跟半件香蒜飽。佢嘅「香蒜飽」應該係用平底鑊整嘅，不過間中都有烘燶左少少嘅情況。有次我去到單叫香蒜飽加飲品，收銀姊姊叫我加多一份小食，相差三蚊啫，所以我加左個「肉汁薯條(連皮)」($30)。結果發覺個薯條好好食，但係太多澱粉質食物，食唔晒！

又有一次，見倒對面果位哥哥食緊咖哩豬扒，我問佢啲咖喱得唔得？佢答：好OK喎！

第二次我去，咪叫咖囉試吓囉！唔係唔好食，不過唔夠「翠華」果啲好食囉！不過，咖喱口味各有不同：有人喜歡印度咖哩、有人喜歡印呢咖哩、有人喜歡日式咖哩、甚至泰國咖哩，我則喜歡越南咖哩：貪佢香而不辣！口味各有不同，實難一概而論。

例如，呢度嘅午餐肉會醮粉炸香。對我嚟講咪唔好囉！但係小朋友鐘意食。

記憶中，以前快餐店好似都係用紙杯碟，其後改左用塑膠。用紙杯碟盛食載物，大家又點睇呢？

呢啲小鋪，我祇會響非繁忙時間幫趁：好似我咁，晚飯五點幾食咪係非繁忙時間囉---下午茶太晏、晚飯又太早！有一次我忙到晚上十時才有時間食飯，咪去呢度囉！果陣得六個客人。

為左節省人手，要先在收銀處買左食物才搵位坐低，稍後有人會將食物送到；因為細鋪，唔駛驚買完嘢冇位坐，以前快餐店就會有呢啲情況！我指嘅當然係講一個人食啦。