L Entrecote De Paris

幾個月前經己約定朋友尋晚去呢間法國餐廳食飯，Sorry，其實成晚冇飯食！

朋友告知，香港真正法國餐廳唔多，所以咁吊腳都要嚟試吓！好吊腳架---響中環雲咸街直上，去到與蘭桂坊接合的地點。大家怕者都知，雲咸街係斜路，尋晚又淒風苦雨，真有點搵食艱難的感覺。

餐單獨孤三味，鐘意食就食，唔鐘意就走！尋晚其中一位朋友臨時甩底，我地三個人，於是叫晒三個餐，同侍應講我地大家分嚟食。

一號餐：合桃菜沙律+牛扒(我地要五成熟) $268

二號餐：合桃菜沙律+煎三文魚扁麵 $268

三號餐：合桃菜沙律+蔬菜麵 $180

唔收服務費，麵包薯條任食！

唔食沙律、唔食合桃嘅走得！唔識講英文走得！

尋日閒日，我地七點食到十點都係得廿幾個客。

牛扒先上，每人分倒兩片，伴左啲綠色嘅醬汁。朋友問侍應：「果啲係咩嘢汁？」(通常餐應食都離唔開燒汁、洋蔥汁、黑椒汁之類)

女侍應：「Green sauce(綠色醬汁)」

我都見倒係綠色啦！答左等如冇答。

牛肉好軟稔，多汁，汁醬亦好味！可惜太少啦。

朋友又再問另一位男侍應：「果啲係咩嘢汁？」

男侍應：「Secret Sauce(秘製醬汁)。」

朋友：「係咪有芥辣？」

男侍應：「secret！」

我：「你唔好難為人地啦！都話左係秘製咯，點會講俾你聽呢。」

三交魚配扁麵：

三文魚熟食通常都會「鞋」，除非用低溫煮(半島間瑞士餐應有得食，不過成千銀食個餐值唔值啫)。呢度舊三文魚唔算鞋，可以接受。咦！啲麵又係落左佢地嘅秘製醬汁喎！

蔬菜寬條麵

呢味最唔好食！真係平嘢無好？佢果啲根菜類(不同顏色的瓜)太咸---我估佢唔係煮時調味，而係預先醃咸左啲根菜，煮時切落去煮！我地三個都認為太咸。

我初一病到依家，尋晚講講吓都差點冇埋聲，所以連我至愛嘅甜品都唔食！另一位朋友叫左檸檬批，算係幾大件(成七十八蚊喎)，四個人分嚟食都可以。佢一試就拍晒手掌！

我：「你點講我都唔會食架啦！我好忍得架。」

另一位朋友試左少少，都讚好食。

總括嚟講，佢呢度食品種類選擇太少！我都唔係揀飲擇食嘅人，我都祇係欣賞佢嘅牛扒，但係我又唔會因為想食牛扒而去第二次囉！

薯條任食，可惜與我無關！我一向唔喜歡食薯條，雖然朋友讚佢啲薯條好好食。