如此民主

我唔食你休想食

未開波先行躀直

得把口萬事不靈

死都要與民為敵

自從阿爺收回紫荊大食堂揸拂權之後、紫荊人嘅飲食習慣就起了巨大變化。雖然總舵答應過紫荊人餐照開、酒照飲、一切照舊玩足五十年、但條件就是要進食由阿爺指定嘅套餐。事隔十多年之後、阿爺發現紫荊人在飲食要求有所提升、於是計劃在2017推出自助餐、由紫荊人從中挑選自己喜愛嘅食物。正當人人對自助餐有所期盼之際、那群日日喊要食自助餐嘅老飯忽然撲出來反對、而且仲要以少制多搞散檔攤、即係話佢哋唔食、你哋亦唔準食。

早前老飯嘅涼茶大狀替你哋揸主意、佢話呢檔自助餐係由阿爺發版、而不是由佢哋發版、所以食亦無味、還是不吃也罷。講到這裡、在下感到十分好奇、究竟那一家食堂嘅自助餐係由顧客發版、而唔係由經營者發版嘅呢、吓？更令人費解嘅就係、多次由親老飯組織所作嘅民調結果均顯示、大多數人都願意接受食住先、即係先食咗這一餐、然後再等下一餐睇吓有乜嘢新款菜式。但老飯卻公然背棄民意、係都要搞散檔自助餐為止。所謂口味各有不同吖嘛、老飯唔鍾意食、並不等如所有人都唔鍾意食、就算真係有人唔鍾意食、都冇必要搞到人人都冇得食啫！點解唔畀紫荊人自己在2017運用自己雙腳去決定食抑或唔食？其實唔使怕喎、到時如果只得小貓三幾隻去投票、即係證明阿爺檔自助餐根本上不受歡迎、咁就有大條理由喊佢從新發版、直至紫荊人鍾意才算數吖嘛！相反、如果真係人山人海去投票、即係話這是民意所在、咁就無謂與民為敵啦！係冇？總之一句、連去投票嘅機會都被老飯剝削就梗有人扯火、到時老飯班友必成眾矢之的。嗱嗱、千祈咪畀我噏中、能夠豁出去反到最後嘅只係嗰幾個在「和尚打傘」期間有如豬八戒照鏡（裡外不是人）嘅老飯負資產人物、其他尚有生機嘅人到最後關頭就會轉軚。點解？咪就係冇人肯陪葬嘅囉！唔信？咁就大家擘大雙眼等戲睇啦！