咸蛋節瓜湯、大豆芽冷盆
2015/06/16 10:57:51 網誌分類: 食譜
炎炎夏日,食又冇胃口、煮又懶郁手!但係基本上我唔係咁喜歡出街食嘅人,解決方法係盡量煮啲簡單嘅嘢!
咸蛋節瓜湯:
仲唔簡單?我好少滾湯,我鍾意煲老火湯,但係呢個湯又容易、又便宜、又省時,仲有湯有菜添!
材料:
節瓜兩個切骨排狀
咸蛋兩隻,蛋黃/蛋白分開
薑片
沖菜一兩片(視乎咸度)
一. 用適量水放薑片煲滾,下沖菜及咸蛋滾約十分鐘,試味!如夠咸,可先丟去沖菜免過咸。
二. 下節瓜再滾約十分鐘(此時可加少許油),將咸蛋白拌勻倒入湯內即可。
註:
一. 依家買倒嘅咸蛋較以前味淡,所以唔會太咸!驚太咸咪落一隻囉,不過咸少少仲墜火。
二. 咸蛋白分開放入是唔想蛋白過熟。如冇要求嘅,咪一早落囉。
大豆芽冷盆
夏天喜歡凍食。因為這個餸冇肉,可以一早煮好放雪柜,食前一小時攞出嚟攤至室溫食。
材料:
大豆芽半斤去尾洗淨
豆泡五蚊,飛水切片揸乾
蘿蔔乾兩條,洗淨切幼絲
唐芹一棵切段
一. 用白鑊先烘大豆芽,加入豆泡再烘乾。
二. 落油,下薑片及蘿蔔絲拌炒一會,下少許上湯或水燴煮片刻,下生抽及糖調味,最後加入唐芹及麻油炒片刻即可。
三. 上碟攤涼,蓋上保鮮紙放雪柜。食前一小時取出。
(當然,熱食都可以)
回應 (0)
我要發表