洋蔥冬菇炒豬頸肉

我家雪柜經常都備有火鍋用牛肉片、豬肉片、羊肉片，但係我唔係用嚟作火鍋用，而係用嚟炒餸，貪佢份量少，肉又薄，一炒便熟又唔靱！我一向響「大昌行」入貨。

最近經朋友介紹，響灣仔一凍肉鋪(唔係肥媽講果間)買左啲急凍牛肉片、豬頸肉片同羊肉片。佢同大昌行果啲最大唔同係：大昌行果啲切得好薄，無論係幾小心，都會炒到散晒、碎晒，雖然冇影響食味，但係賣相冇咁靚。呢度啲肉都切得薄，但係煮完都好完整！

早前用此店的牛肉片炒過餸，炒出嚟好原整，牛肉亦好juicy(不過唔記得影相)；尋晚用豬頸肉炒餸：一字記之曰---正！豬頸肉好處係點炒都唔會靱，而且買新鮮果啲，要成塊買：細塊果啲太薄，大塊果啲又食唔晒！買急凍嘅，份量可以自由選擇，而且睇相都睇倒冇咩嘢油份。

材料：

急凍豬頸肉片，解凍

已處理冬菇數隻切粗條(30/8網誌「講飲講食」分類)

半個洋蔥切幼絲

芡汁：蠔油、生抽、糖、生粉、水、麻油

一. 豬頸肉下蠔油、生抽、糖、胡椒粉、生粉、水醃一小時。煮前下油拌勻。

二. 燒油爆洋蔥及冬菇，下幾粒鹽炒至軟身，撥至一邊，加入豬頸肉，煎完一面反轉，灒酒，再與洋蔥等炒勻，下芡汁即成。

呢味真係懶人之選！