人貴自知！

今期「粵劇曲藝月刊」有以下一文(節錄)，值得曲友參考共勉：

如今有一派曲友不問自己天賦，以新為勝。鶯聲嚦嚦的女平，唱「新霸王別姬」，「血濺未央宮」；聲如洪鐘的男平，唱「南唐殘夢」︴「泣血水繪園」、「浪捲飛花」，還頻頻出騷！另一派以仿為優，跟原唱曲譜。冇高子的唱「紅」腔、「仙」腔」、「任」腔、「凡」腔；無鏜音的唱「蝦」腔、無氣度的唱大喉。亦有唱藝未到的大唱高難度腔如「新馬」腔、「風」腔、「琴」腔等等。區區不反對嘗試，只應適可而止，遇絕而退。唱工之道也，非十年無小成。人有幾個十年？更何況是中年才入行的？無謂受唱齡之蠱惑，這是偽邏輯。若碰到只要交學費，必定能學齊的三無(無料、無知、無良)導師，更應無鞋挽屐走矣。

更壞者，是強行越天賦行事。譬如本身音域去不到唱腔要求的高子，便用喉嚨肌肉來壓迫聲帶變形發高音，難聽如夾死老鼠。久之，聲帶磨損，長瘜肉乃至破拆不成聲都是有可能的。反自然當受報復，逆天賦亦然也。

----------------------

話雖如此啫，最弊係人人都以為自己「正」(包括我在內)，所以總認為別人唱得唔好、人人以為自己最好！所以依家睇「騷」，一邊響度諗：唱成咁、何解出騷，何解揀此曲唱？另一方面，自己卻都做緊同一樣嘢！

早個星期觀看左兩場「騷」----sorry！嚴格啲講：係一場「騷」都睇唔完。

一場係半邊星(即係我形容為「臘鴨騷」果種)、另一場係業餘折子戲騷。半邊星果場因為大部份嘅「星」都係真男人，部份我從未聽過，所以一心諗住會看畢全場架，誰料聽到第三場(睇左兩首唔得，諗住中場休息才走)都冇法子再忍落去，另外果一邊真係......偏偏俾得起錢請「星」嚟伴唱嘅，以為有粒「星」傍住就得，誰知相比之下，更加黯然失色。

至於折子戲果場，我認識部份演出者，基本上：唱功欠奉，不過以做手來說，算係唔差！呢個團體記憶中一年祇攪兩場折子戲，並不濫演。全場得一位子喉是唱做俱佳者(我認識佢，演同唱均超過廿年)，睇完佢我都冇興趣睇落去，因為其他演出者我都知道係咩嘢料。

「半邊星」果場頭曲開始左，入座觀眾不足一半(高山新翼得六百座位咋)；至於折子戲果場，做完第一場入座率亦祇得四成人，唉！觀眾那裡去？

政府花咁多錢興建高山新翼有何價值？是康文署政策問題、還是康文署職員批場手法有問題，引致觀眾流失呢？