咖哩粉絲三文魚頭

響Aeon買左個冰鮮三文魚頭，一於用咖喱整嚟食。冰鮮一定好食過急凍貨，所以價錢亦較貴---$29. 急凍嘅、同樣大小約廿蚊。

材料：

三文魚頭一個，洗淨以鹽及黑椒粉略醃

乾蔥片、蒜片各兩粒

粉絲一小紮浸軟剪成小段

咖喱粉

黃薑粉

椰醬一小包(我響「祥興」買，十蚊三包)

一. 燒油，用少許生粉撲三文魚頭，落鑊略煎兩面盛起。

二.  燒油爆乾蔥片、蒜片，下黃薑粉2茶匙、咖喱粉1-2茶匙(視個人喜歡辣度)炒勻，下三文魚頭及少許水、鹽、糖、生抽調味煮滾，轉細火炆至魚頭熟(約5分鐘)，加入粉絲及椰汁拌勻略煮即成。