女人心裏面都有一個「吳錦港」
2015/10/29 08:41:06
網誌分類:
生活
佢有啲不修邊幅、啲鬚成日唔剃好似鮑魚刷，講嘢有啲衰格同口臭，你同佢「爛」friend，稱兄道弟，食飯嗰陣會夾最好食啲餸畀佢，又唔客氣喺佢飯碗夾番嚿畀自己，佢跌親你會好緊張，但又要扮到唔緊張，仲要踩多腳，笑佢乜你咁輪盡，抵你死！夜晚黑，你仲會同佢WhatsApp互窒講笑講唔完，你話：你咁款，邊有女仔鍾意你！
人哋笑你哋係一對，你就話，邊有可能！仲叫佢千祈唔好鍾意自己。
其實，你心裏面，有少少鍾意佢。佢講啲笑話會嗆到你氣咳流眼淚，佢同你有莫名的共鳴。當佢凝望你嗰陣，你會有觸電的感覺，冇人留意嗰陣，你會偷偷哋望吓佢一眼。佢拖你落石級時，你好享受，希望時光永遠停留喺呢一刻，有佢喺你身邊，你好有安全感，喺你的想像裏面，你擁抱過佢一千次，但係現實中，一次都唔敢。因為你知道，佢永遠唔會屬於你。
當你唔舒服或唔開心，只要一諗起佢，就好似苦茶加咗粒糖，甜番晒，不禁自己微微笑。
你發現佢望緊手機裏的女仔相，你個心會似有嚿鉛，墜到谷底，當佢畀張女仔相你睇，問靚唔靚呀？你好大方咁豎起手指公話：幾靚呀，追佢囉！轉頭偷偷地在廁所喊到豬頭咁，因為你知道，你將會失去佢……
你憎恨自己，點解咁冇用，連日思夜想的人，都唔敢講呢四個字：我鍾意你。但你又知道，呢四個字一出，就像打開了一道不能打開的門，矛盾和災難馬上湧出來，甚至即刻失去佢。
「吳錦港」是你的守護天使，是你命中剋星，是你不能跨越的宿命。「吳錦港」是他的名字。
潘麗瓊