金菇牛柳卷

以前我喜歡響「大昌行」入定貨：火鍋牛肉、豬肉、羊肉片....160克(四兩)一盒，少少地，啱我！

如果響街市買咁少，一定唔會賣俾你！呢啲火鍋片份量啱我、而且煮熟一定唔會老、唔會靱。

經曲友介紹，我依家響灣仔一凍肉鋪買火鍋肉片----切得冇「大昌行」果啲咁薄，但勝在煮出嚟比較完整，唔會爛溶溶！惟一美中不足是每盒份量較多，但分兩次又唔夠。

材料：

急凍火鍋牛肉片一盒

一小包金菇

蒜片兩粒

蔥段(有便用，好似我咁，咁啱冇，咪唔用囉)

一. 牛肉片解凍略沖，抹乾。下蠔油、生抽、糖、麻油調味(先調勻)略醃。

二. 金菇連膠袋切去尾部。去除膠袋略沖水，分開一小束。

三. 用牛肉片卷上金菇排好。

四. 燒油(唔怕膽固醇嘅，可以加些牛油)將牛柳卷排上鑊內，加入蒜片；煎好一面反轉另一面，灒酒，淋上芡汁(蠔油、生抽、糖、水、粟粉)及加入蔥段炒勻，即成。