早安越南

大佬來港，逗留時間唔多，日日都是食、食、食！

為左遷就我早食晚飯習慣，那天約左下午五時卅分響紅磡黃埔美食坊「早安越南」食。因為時間尚早，仍是下午茶時段，所以先柯打左三份下午茶餐：

一. 木瓜沙律：我唔食酸嘢！

二. 越式春卷：得個脆字，但唔鬆！

三. 火車頭：其實等如我地嘅「車仔麵」，咩嘢都有啲咁！我寧願正正式式食個牛肉粉。

四. 正餐嘅「黃金蝦」：算係做得最好果味----咸蛋黃份量剛好包住蝦(所以唔會太咸)，炸得脆，成隻蝦連殼包括頭尾都可以食落肚：當然係趁熱食啦！凍左就稔。

五. 正餐「香茅雞翼」：祇是炸雞翼一碟，冇香茅味！

六. 亦是正餐「豬頸肉濱海」：豬頸肉偏甜！與紅磡「金坊泰國菜」的烤豬頸肉相比，後者勝！

七. 蒜茸蘿蔔苗：幾好食！

大佬、姪仔姪女都係酒客，不過試左杯越南啤酒後，都要學「阿蘇」咁雙手打交叉----啤酒味唔好兼夾唔夠凍！熱啤滋味如何？可想而知。

食物質數真係好一般(服務唔錯)---唔難食、又唔係好食咁囉！即使如此，我地食到七時半左右，佢差不多客滿，果日係閒日星期四。

有一段時期香港開左好多越南小鋪，後來泰國菜起而代之，近期輪到韓食----香港人都係貪新嫌舊嘅，可能因為越南食肆買少見少掛，算是聊勝於無啦！