康和閣--大閘蟹鮑魚套餐

姪女來電，問我紅磡邊度有大閘蟹食？我答：應該所有酒樓都有！一於「康和閣」啦！門口有海報，一定有大閘蟹。

心諗：我習慣早食，加上當日又是閒日，所以冇諗過要訂檯。

咩嘢叫做人算不如天算呢？我地六點鐘去到，接待處告知當晚有派對，祇有少量散座；我答：「我地四個人啫！一張細檯夠啦。」

原來該酒樓在此開業剛好一周年，那夜招呼自己股東、行家、職工、供應商...幾十圍，還請了歌星演唱。我們所在那個廳房剛巧與大堂隔開左，佢地要嚟都冇用，所以可以招呼我呢啲「飛來蜢」！

可能佢地大部份都唔係年青人，歌星演唱的歌，都是我大佬那年代的中西流行曲，大佬最開心，唔駛俾錢有免費娛樂！大堂放了一個巨型壽包：嘩！好有型呀。不過，我地有得睇、冇得食！

既然一心嚟食大閘蟹，蟹一定係必叫架啦。單叫一隻大閘蟹要百五蚊(聲明係五兩重)，我見有以下呢個套餐，問過部長此餐的蟹與單叫重量相同，咁當然係叫呢個套餐抵食啦！

美中不足的是：食大閘蟹通常有薑茶跟，但此處冇，祇奉送紅酒一杯！作用與花雕酒同，但總覺得唔係咁匹配；不過，最緊要唔好配啤酒啫：蟹與啤酒均屬寒涼之物！

以下食物是跟出菜次序：

一. 壹哥海蜇叉燒/燒肉----我地叉燒/燒肉各半，咁咪兩樣都可以試囉！呢度嘅燒味食過幾次，有水準！

二. 主角大閘蟹出場(全部蟹公)：雖然細細隻，不過都幾多羔。唔講唔知，原來大佬係第一次食大閘蟹，美國冇得食。姪女覺得抵食：響上海，咁嘅價錢食唔倒！

三. 花膠燕窩羹：真假都好啦！碗中放左有成一湯匙燕窩。可惜吖，食大閘蟹需時，我地未食完蟹，其他菜一齊出晒；好彩碗羹有蓋咋。

四. 蠔皇剌參鮑魚：食完蟹同羹，諗住鮑魚凍左會唔好食；諗佢唔倒，又OK喎！

五. 翡翠炒鮮斑球：翠玉瓜炒得爽甜，斑球(每客兩大片)亦唔錯！

六. 時果：西瓜甜，所以食完西瓜再食哈蜜瓜就覺得佢唔夠甜。

我地一致認為呢個餐物有所值！