「小偷」不算是「賊」？

2013年港姐亞軍蔡貝思於參選時，報稱已獲得工商管理學士課程畢業證書，現被踢爆學歷成疑。

其實，參選港姐啫，除左有年齡限制，據知冇學歷限制；何故要虛報？想藉此嫁入豪門、方便第日擠身上流社會、對選舉得分有利？

至於佢係咪大學畢業生，根本與我無關！講真吖：依家年青人，最好唔好俾人知佢係大學生，會俾人「眇」架！因為大家會聯想到：粗口、涉密、冇大冇細、不識尊重.....

問題係：黃秋生接受訪問，被問及對此事睇法時，竟然答：「件事點都未知(不過，面對傳媒，當事人都冇否認喎)，俾機會佢整理(俾時間俾用另一個大話冚呢個大話)、解釋，或者係誤會。如果呃呢啲嘢做特首、教授就有問題，但如果呃呢啲做侍應冇咩嘢所謂。」哈哈！呢啲唔係歪理係咩嘢？

大盜是賊、小偷便不是賊？以前為人師表、為人家長都會語重心長教學生、教子女：細時偷  針、大時便偷金！當事人依家大人大姐才偷   針、等到老年才偷金就冇所謂？

好彩呢位仁兄唔係做編劇啫，睇佢編劇嘅戲咪肯定教壞細路？

依據香港法例，偽造學歷，最高刑罰可判監十四年。不過我唔知佢係純粹虛報、定係連學歷都偽做埋？但係難道「無線」做嘢同佢編嘅劇一樣咁兒戲，編劇寫咩嘢、就做咩嘢，完全同社會脫節？人地報係總統佢都信？

N年前，我響政府某部門工作，當時同事們祇要考獲某一個專業學會的認可學歷，即有機會晉級。當時，有一位同事偽造文件，將成績表上個「F」(Fail不及格)改作「P」(pass及格)；其後因有其他同事在試場見倒該位同事應試，才揭發他曾偽造文件，最終政府要即時退休(當時佢四十歲左右)---咁經已算係經判架啦，冇炒佢魷！

最近嶺南大學協理副校長兼總務長夏迪星（Herdip Singh）2013年取得菲律賓太歷國立大學（Tarlac State University）博士學位，其畢業論文涉抄襲一份來自瑞典隆德大學（Lund University）的碩士論文。大家有留意新聞嘅都知道事情最新發展係當事人現申請無限期休假。

所以話啫，既然參選港姐根本唔需要持有大學畢業資格，佢何解要冒充大學生？咁經已證明呢個人品格有問題、誠信亦有問題！

難道打劫銀行的是賊，入屋行劫嘅唔算係賊？

講開又講啫：無線播緊果套「梟雄」，三位上海大亨----分別由湯鎮業、黎耀祥與黃秋生擔任，前兩者都係由青年演到壯年，何解偏偏黃秋生年青時角色要由馬國明去演？睇落怪怪地，不過睇落黃秋生又幾似馬國明；唉！如果馬老左似佢，又真係......咁嘅安排，係因為「無線」認為馬演唔倒老角、抑或黃做唔倒年青角色呢？看他們年青時，三位年紀應該差唔多，甚至我一直認為馬係三個人之中較為年輕嘅一位，何解期後黃秋生睇落年紀大過晒另外兩位(捱殘左)？啲女角又好似個個食左防腐劑咁：冇老！好彩佢地都算係好戲之人，好過晚晚屈觀眾睇姓洪嘅、姓陳嘅、姓黃嘅、姓林嘅(有興趣嘅，猜吓迷吖)....同埋今日講嘅呢位吖；嘩！某些懶音多到唔恨。