輸得好！

尋日係「佔中」後首次區議會選舉，意義重大-----從今次結果多少反影出市民對「佔中」或支持「佔中」人士的看法。

我從八零年代有區議會選舉開始，直至零四年提早退休一段時間內，每次區議會及立法會選舉，均有參與投票與點票工作。

回想當年區議會投票結束，票箱需運往指定的點票站點票；如在離島區(包括南  、長洲、坪洲、大嶼山)，因為要用船隻運送票箱，點票工作每每點到天明。近年改變做法，大部份投票站在投票結束後，改為點票站，因為省了運輸時間，所以點票工作快左，理論上兩至四小時應可點完，基本上區議會選舉得果幾千票，所以真係唔明尋晚點票工作咁慢，有些可以攪到天光。

尋日我去投票果陣，我在未入票站前，便經已拎定身份證(避免阻住個地球轉)，當時我身份證字頭祇得一人排緊隊，兩個職員負責核對身份證、發出選票都好似驗屍咁驗，真係嘆句：依家啲人工作效率勁差！再睇吓晚間點票(電視新聞，有畫面架)的情況，亦唔見得好囉！

負責立法會選舉工作時間長好多：我當時在新界工作，車程要預個半小時。當年我早上五點半便要動身上班，日間要在辦公室或外出處理投訴個案，到投票結束又要在點票站負責點票工作至第二朝八點幾至完，返到屋企都要十點幾----一直工作左三十小時！當時點捱？飲雞精囉---須知道，做呢啲嘢係唔錯得架。

回想當年每逢選舉都冇得瞓，上一屆咪好啲囉！退左休唔駛參與，咪有得瞓囉。事實又並不盡言---響政治舞台打滾咁多年，總有一些人物是朋友，他們/她們(各黨都有，淨係冇「社民連」！當年更加冇甚麼「冷血？？」啦)參選我都希望佢地成功架，所以成晚都聽住電台，知道佢地當選後，便即時透過短訊恭賀佢地。

一場「佔中」鬧劇，泛民與建制兩營？唔駛講啦！我對泛民徹底失望(雖然我與某些民主黨議員仍算是好朋友)，尋晚罕有咁睇住電視新聞，渴望見倒我最想見嘅結果：

第一喜：陳家洛輸左----佢都算係香港人？佢一家都算係香港人？佢真係會為香港咩？雖然海怡半島係中產區，外藉人士多有利公民黨(佢地黨員不少是娶或嫁外藉人)，但慶幸佢最終輸左！

第二喜：何俊仁輸左----我一直認為「區議員」與「立法會」議員並不可以相題並論，區議員要求係貼身嘅地區工作，身兼「立法會」與「區議會」兩份公職，除左對議員本身有利(兩份人工)之外，對區內居民係百害而無一利嘅！再者，呢位「仁」兄兩份收入以外，仲要收....

誠意恭喜以上三位：落選成功！

以下呢位係意外之喜：不過「無線」好似一早睇好佢喎！點票期間都專登訪問佢：

雖然佢輸左我好開心，不過選倒果位都唔見得好喎！唉，世事又豈能盡如人意吖；好彩我個「哎呀大仔」華麗轉身、棄暗投明後，佢選果位同我選果位都成功當選，都算係老懷安慰啦！

噢！睇到呢度，我可以上床就寑了，而且真係瞓著覺都識笑。