梁振英唔好連任

我對施政報告一向冇期望(咁咪冇失望囉)，因為年年都係得個講字，反正十居其九都係俾人反對，行不得也哥哥。

今年施政報告出籠後，竟然有人叫梁振英唔好連任！我對梁一向冇好感，但係我相信如果香港政府一日唔強硬起來，無論誰人坐落特首個位都冇好收場！你話我話架啦：即使係「犯人」班人坐落去，一樣會俾自己人清算！竇娥話齋：皆因官也喜貪贓，枉法太無良....如果人人可以廉潔自守、認清楚自己係中國人，立志為自己國家、香港做事嘅，咁就一天都光晒啦！

如果係強勢政府，邊個做特首問題都不大：祇要果位仁兄/仁姐身家清白，包括埋屋企人喎(做特首真係禍及妻兒架)----自己行得正、企得正都唔得，仲要你嘅屋企人、親朋戚友都潔身自愛先得！呢樣嘢最難吖馬---好似「貪曾咁」，咁多親友，居其位、有其嘅權都唔益街坊就假啦！所以，我之前都講過，做特首最好係斷六親，想益人都冇得益！

咁都未得！仲要有個唔係直選嘅立法會。依家啲政棍為左選票真係咩嘢都做得出；當選後為左錢又係咩嘢都做得出！你試吓：做議員冇津貼吖，你睇佢地仲會唔會爭崩頭？因為做左議員冇津貼，淨係等收黑金？渺茫啲掛！

局長之類又要嚟做咩？以前公務員憑能力、年資升上高位有咩嘢問題？依家委任局長搵人都咁困難----特首唔識嘅又點知佢有冇能力？特首識嘅又話用人為親！加上真係有能力嘅又未必樂意接受委任：諗起要日日對住班野獸，真係命都短幾年！不如響出面搵真銀好過。

真係難架，你估「阿貓」、「阿狗」都適合做局長咩？人地做公務員捱到退休年齡都未必有能力坐倒局長個位，但係有人廿幾卅歲人仔，瞓醒覺就做左副局長喎！唉，仲捱咩嘢鬼吖，我做公務員都心淡啦！咪見日做日、等放工、等退休囉！

講來講去，都係個「代議政制」累事！依家啲局長個個姓「吳」名「得掂」，立法會變成「垃圾會」、「鬥獸場」....

以前我地見倒議員真係肅然起敬架，依家？唓！....噢，唔好意思，又粗鄙左。