廉署之馬，駛咩驚喎！

笑看天下：廉署切忌整色整水

被視為前特首曾蔭權爵士愛將嘅民政事務局常任秘書長馮程淑儀，被揭與賭王三太的胞妹兼前「港聯直升機」股東陳婉玉交換物業，涉利益輸送及官商勾結。

呢單嘢涉及至少三大疑點，包括馮程淑儀透過交換物業避稅約一百萬元；換樓補價低於市價至少逾一百萬至三百多萬元；其丈夫馮永業任職政府高官時，與陳婉玉旗下的直升機公司有業務來往，最終「港聯」成功奪得經營權，如此三角關係，有議員及政黨炮轟事件涉官商勾結及延後利益輸送，到廉署舉報屬應有之義！

馮太辯稱交換物業時不知對方身份。孟子說：「知者無不知也，當務之為急。」意思是說，真正有智慧的人沒有不知道的事情，但只在應當做的事情上才表現出急切。老朽絕對相信馮太愛炒樓，對於「樓換樓」的得失必一清二楚，也許她認為兩者的差價亦不過千萬左右──屬「濕濕碎」，如我等市民到街市買斤菜，買賣時可以不知對方乜叔乜嬸，十元八塊也不必議價；之不過，有物業代理界人士質疑馮太的說法，因為就算佢真係唔知，代理一般都會查清楚持有物業公司嘅底細。此外，有資深代理就話：從無見過有兩名陌生人交換物業，你估盲婚啞嫁咩？

此外，馮程淑儀購入涉事跑馬地相連單位後，市傳叫價五千萬元放盤，較購入時估價升近七成，若然最終能以此作價售出，持貨約兩年即勁賺二千萬元！阿哥，咁嘅「筍盤」你竟連對方係乜水也不知，未免太不近人情吧？

有啲嘢明明係「常識」，你卻硬要把它變成「謬論」，而且要人相信「謬論」終有一日變成「真理」，的確有相當難度！

香港廉潔排名已連跌四年，「當務之為急」，就係的起心肝，徹查呢單三角官商勾結嘅來龍去脈，唔好整色整水，否則廉署半邊招牌好易冇埋！

施友朋

----------------------------------------------------------

唓！廉署之馬，駛咩驚呀！君不見：咁多高官牽涉貪污舞弊事件，一係唔告、一係告唔入、一係俾官放！

等政府決定告唔告可能都等到佢退休、即使決定告佢，排期都排幾年、真正上堂果陣，法官大人又可以話證據不足，交番俾公務員事務局決定駛唔駛內部處分(果陣咪暗地裡話懲處左囉！究竟有冇？天知、地知，但係你同我都唔會知)，有幾多人好似許Sir咁唔好彩吖！以機會率計，貪污舞弊真係制得過架。