退休

2016/04/17 10:50:39 網誌分類: 生活
17 Apr

退休?唔係馬?我大大話話退左三次休,響2012年決定真真正正退下火線,話之老板扮聽唔倒!我退休前半年,經已同佢講我呢個合約完結就唔續約,其後每月出糧便提佢一次,我叫佢好搵定人接替我,否則我會寫低要交接嘅事項,到時到候就失踪架啦!直到最後一個月,佢見反魂無術,但果陣咁短時間,又冇可能請倒人代替我,惟有將我要負責嘅工作、分開俾唔同嘅同事負責,頂住先!

今次講退休,係我姪女呀!佢依家去左日本旅行,尋日終於報平安:

日本這邊廂風和日麗,陽光普照,那邊廂.....唉!

姪女在上海工作,原來不知不覺經已十年;今次合約剛完,佢冇續約,打算提早退休,回美陪伴佢阿媽(我大嫂)。阿嫂去年年底入左深切治療部,雖然出了院,但至今未知出了什麼問題;姪女因此決定退休返美。

吓!退休?佢細我廿年,咁快講退休?

姪女響美國名校讀完博士、碩士課程之後,回港工作過一段時間,隨後便到上海工作至今,咁快可以退休?除左佢做人勤奮外,當然唔排除佢投資得利啦!

當佢告知我打算退休,我問:你同我都係定唔倒落嚟嘅人,唔工作、你唔會悶咩?

姪女(猶疑一會):或者返美開間兒童藝術教育中心。

有咁嘅想法,可能因為佢細佬(我姪仔)有兩位幾歲大嘅小朋友,佢諗住因利成便掛!

我:咁你咪要學番一兩樣手工藝?

姪女:我冇諗住教人喎!我諗住請老師教。

我心諗:咁佢真係搵落唔少---餂得起。不過佢讀書多過我,美國情況佢清楚過我,或者真係有得做都唔定!

當然,佢有佢嘅想法;我地啲咁保守嘅人,依家out架啦!

話口未完,佢剛回港便收到擸頭公司電話,想請佢去北京工作。我:如果要去北京,不如留番響上海!

姪女:如果佢半年後搵我,或者我會考慮。

我一位閨蜜的兒子(做研發新藥)也在上海工作,他聲稱合約完後,無論老板威迫定利誘,打死都唔續約,上海空氣太差!咁北京咪仲差---霧霾不退!

雖然,現今社會,好多人都想搵快錢,最好三十出頭便可以退休,跟住周遊列國.....但不要忘記,我姪女呢廿年都捱得好辛苦(試過捱到壓力爆煲)----當年佢響香港工作,真係經常做到通宵達旦架!

所以話啫,依家啲年輕人,又要工作時間好、又要政府出手幫佢置業(政府唔幫咪父母幫囉,總之唔會自己儲錢)、又要唔駛辛苦......唉!上一代嘅人講得好:唔辛苦邊得世間財吖!

要想生活好、要想退休早.....從正常心態去諗,咪早啲積極工作囉!雖知道:啲錢唔會無情情響天度跌落嚟嘅!係你都唔執得,犯法架----不過,基於上次經驗,我諗依家啲人會諗吓:有咩嘢辦法執左錢、又唔會俾人發覺囉!反正依家香港執法咁寬鬆,有法又不依,夠膽搏一鋪(唔成仁,就成功),咁就可以長嘆咯!

 

回應 (4)
我要發表
VanYYY
VanYYY 2016/04/17 18:09:21 回覆

因為曾經揾過大錢。

383383
383383 2016/04/17 17:26:39 回覆

我第一次選休是三十七歲。

而家,等第二次退休…哈…

VanYYY
VanYYY 2016/04/17 16:05:49 回覆

話吾定佢听日就同你講:我退休啦!

開心van仔
開心van仔 2016/04/17 14:59:13 回覆

我個姪仔十幾歲時話二十五歲退休!而今二十幾歲做到食飯都無時間!唔辛苦焉得世間財!退休要很多儲備架!現代的人長命左呀!

user

最新回應

立 冬
立 冬 2018/06/13

新版都有好處的, 至少用手機來睇會較以前方便.  你休息夠了再回來啦!   {#iconb_21}

VanYYY
VanYYY 2018/05/24
@域 流亦詩...

雖然我封舉,有空仍會拜讀你的大作!

KING.
KING. 2018/05/19

都要改啦, 以前頭條blog都唔係mobile reponsive web. 而家改左,你有冇發覺冇以前咁棘.

域 流亦詩
域 流亦詩 2018/05/18

祝你身體健康、愉快。它朝有機會再在博海相見!