信用卡達人從魚蛋悟理財之道 小斯：死慳不如賺

【個人理財】「網絡紅人」小斯以信用卡賺盡所有旅遊優惠聞名，18歲已擁有6位數積蓄，高考會計奪A考入港大會計系，再放棄會計師正職，全力寫Blog，一切源於一串魚蛋悟出「死慳不如賺」的理財之道。

記者：陳洛嘉

周家誠

小斯與一般年輕人無異，喜歡睇戲、叫Pizza、去旅行，但要將以上「使費」變成「賺錢」，正是其理財之道。

「我於單親家庭長大，自細寄住別人屋企，每星期先見媽媽一次拎零用錢，所以要記清楚交咩書簿費。」小斯從小需要自己理財，但強調從不「使凸」，即使玩「召喚王」卡牌遊戲，亦是隨即放售，將使錢變賺錢，「都玩完仲儲嚟做咩？」

中學幫同學碌卡儲積分

不過，真正啟發小斯要理財，是中三與家人到日本旅行後愛上旅遊，故想盡辦法儲盤川。「我都曾經虐待自己，為死慳連一串魚蛋都唔捨得食，但發覺點慳都係無用，一定要諗辦法賺。」

成績優異的小斯中四起補習賺錢，「第一份補習係60蚊一個鐘，仲要補全科。」18歲得到會考准考證作為地址證明後，小斯立即申請當時全港唯一一張扣賬卡。「當時開恒生Enjoy消費卡用200蚊有一分，幫同學訂Pizza就儲到，睇戲仲有優惠券。」

小斯亦將每年利是錢儲起，加上每周補足七日的補習收入，考入大學前已儲起十多萬元。「我比較穩陣，揀讀會計都係因為就業前景清晰，所以鐘意睇baby kingdom（網上論壇親子王國），覺得師奶嘅理財觀好啱我。」

大學借學貸做人幣定存

得baby kingdom啟蒙，得悉內地長年期人民幣定存年息5厘，學生貸款息僅逾1厘，決定借學生貸款加全副身家換成人民幣，到內地敘做定存賺息差。「人民幣不斷升值，一開始每百人民幣兌118港紙，升到122我就走。」滙率升值加上息差，淨賺7厘回報。

秉承魚蛋理論，小斯從不教人如何慳錢，而是要如玩「召喚王」般將使錢變賺錢，踏入信用卡優惠世界後，更是不能自拔。受信用卡賺飛行里數始祖博客粒粒玲子啟發，小斯大學時期開始熟讀每張信用卡優惠，「想慳錢就不能懶」更成為其座右銘。

現時有逾30張信用卡在手的小斯，除到茶餐廳會用現金外，繳水電煤雜費、日常消費全用信用卡過數。「一個月消費1萬蚊，用信用卡起碼賺到300至400蚊。」

小斯笑言，回想平日所作「其實都幾無聊」。不過，若非體內早有理財基因，一串魚蛋又豈能造就今天的「信用卡達人」。