新界西「垃圾會」論壇
我都話一個人唔好做錯事啦!因為錯得一次、好容易就有第二次架啦。
我講過唔睇「傷港電台」(「哎呀大仔」改嘅,又幾貼切喎),繼上次因冇嘢睇焗住睇左「九龍東」個論壇後,尋晚又衰左,睇左「新界西」個論壇。雖然話係錯啫,錯都俾個理由吖!因為「阿仔」住響新界西囉,佢仲係十五、十六未諗定投邊個,我都要幫吓眼至得架!咁算唔算係一個好好嘅理由呢?哼!枉我花左個半小時睇呢個垃圾節目,原來「阿仔」去左高山睇大戲!
今屆嘅候選人名單,多到區區破晒紀錄!冇計啦,呢份筍工去邊度搵?薪高、糧準、可以益埋自己友有得撈、可以開印刷製作公司(肥水不流別人田)、可以收「黑金」、可以....唉!無與輪比。
早幾日爆出其中一位豉油黨候選人涉嫌被恐嚇退選。至於內情依家都係估估吓---咁我又不妨估埋一份吖:最有可能(我話可能咋)係明知輸到離行離列,退選好過!豉油黨一向冇好嘢做,以為呢招即使自己選唔倒,都要累埋其他人嘅心態最要不得!當年如果唔係田XX,二十三條通過左,香港就唔會攪到依家咁亂!豉油黨難辭其咎。
睇完我第一時間whatsapp「阿仔」:郭家麒最賤、何君堯好唔掂!我兩個都唔識,祇係呢個垃圾論壇得嚟嘅印象。
郭響被人質詢環節時,不單冇答人問題,反而不斷問番對方問題!「傷港電台」即是「傷港電台」,主持人冇指出佢嘅不是(咁嘅主持係人都做得啦),無疑是俾機會佢唔駛答兼且浪費質詢者答問時間。好似我呢啲眼眉毛挑通之人,我認為郭係真係有做過損害港人利益之事,因為無詞以對,所以有如斯表現。
記憶中,最初嘅選舉論壇,並非以抽籤方式決定那個候選人接受質詢嘅,所以當時大部份候選人會對將所有質詢指向那些機會大的一兩個候選人;經過多年經驗,依家以抽籤方式決定,好處是每組參選人發問或被質詢的機會均等;當然亦有弊端:抽倒自己友咪互相追捧囉!不過,較之前係公道左嘅。
至於何君堯,身為律師,佢嘅口才(純粹以論壇表現)又真係.....咁又代表咩嘢?以我呢啲局外黎睇,咪係身有屎、難於啟齒囉!如果理直氣壯嘅,又點會答成咁?甚至唔答!
另一位候選人可算是政壇變色龍:幾個大黨都加入過,今次以獨立候選人身份參選---正如有候選人話齋:邊度有水抽咪去邊囉!根本唔駛理理念是否相同。所以,我選人、唔選黨:我一向認為任何黨都有好人、壞人(「社記」/「本土」/「冷血」例外)!祇不過有些黨壞人特別多。
講到呢度,似乎都應該講吓基哥(佢叫基哥啫,唔係「基」嘅!就算真係「基」都冇問題架,最弊另外果位「基」得嚟淨係識得做小丑同禍港啫)。佢今次越區參選,我覺得係冇咩嘢勝算嘅!當然佢唔響「九龍西」參選有不得已苦衷,但係同情歸同情,唔可以因為同情佢而選佢架!要支持都俾果啲「0」支持度架啦:咁先算係鋤強扶弱。
其他果啲,我冇俾意見「阿仔」啦!大人大姊,我冇法子影響佢。不過,佢都答左:今次投票以「兩害選其輕」為主,同我嘅諗法都好相似。
-------------------
新界西候選名單:
1 | 街工 | 黃潤達 | |||
2 | 民主黨 | 尹兆堅 | |||
3 | 香港政研會 | 高志輝 | |||
4 | 自由黨 | 周永勤(己宣報退選) | |||
5 | 熱血公民 | 鄭松泰 | |||
6 | 無申報 | 鄺官穩 | |||
7 | 新民黨 | 田北辰 | |||
8 | 獨立(新界關注大聯盟) | 何君堯 | |||
9 | 民建聯/新界社團聯會 | 梁志祥 | |||
10 | 公民黨 | 郭家麒 | |||
11 | 社民連/人民力量 | 黃浩銘 | |||
12 | 工黨 | 李卓人 | |||
13 | 青年新政/天水圍民生關注平台 | 黃俊傑 | |||
14 | 工聯會 | 麥美娟 | |||
15 | 民協 | 馮檢基 | |||
16 | 民建聯 | 陳恒鑌 | |||
17 | 無申報 | 張慧晶 | |||
18 | 蒞地基督徒 | 呂智恆 | |||
19 | 無申報 | 湯詠芝 | |||
20 | 無申報(土地正義聯盟) | 朱凱廸 |
無得揀之下,可能會無奈地投我不喜歡的政黨,最低限度他們不會破壞香港。