變----是否通？

香港經濟有幾差？睇吓零售業嘅公司業績就知啦！我屋企樓下間「卓悅」都結業啦(佢寫係搬遷，但冇寫搬去邊)，想當年，佢用廿幾萬月租租下該鋪；如果問我，我寧願係「阿莎」執好過：一來佢較近、二來佢大得嚟仲賣埋零食！「阿莎」我極少幫趁，佢嘅存在好似係為左自由人多啲！

我家樓下以前有間「八方雲集」，食餃子及台灣牛肉麵。我經常幫趁，佢門口亦經常排大隊！但年多前，佢結左業，估計係因租金上升問題。其後我得知佢在紅磡灣中心再開鋪，那裡地方較寬敞，但離我家亦較遠，雖然我差不多每天經過，但不知何故，就是沒有光顧的衝動！

上星期六中午時份行過，忽然間好想食牛肉麵，於是行左入去----當時十檯九空：午飯時間喎！星期六喎！真係有點奇。

睇真啲：原來依家改左以快餐廳形式經營---自助買餐、自己拎餐。

原本都冇咩嘢所謂，兩間「大」記、MX都係咁啦！我地呢啲窮人，捧慣架啦！

不過....原來佢地依家轉左用紙杯碟(兩間「大」記同MX都祇係用膠碟啫)；原本呢樣嘢都唔係問題，但係牛肉麵加埋湯有一定重量，所以依然用番瓦碗，其他一律轉用紙杯碟。

問題來了，因為要自己捧餐，果碗麵好重，但係果個盛盆則好輕，有點上重下輕的感覺----嘩！我都覺得重(其實係危險)，如果小朋友/長者(我都係)點拎？

依家兩間「大」記如果顧客有要求，都可以將食物捧給客人。兩間「大」記食物貴過茶餐廳，早應提供捧餐服務啦！但係「八方雲集」我當時祇見兩位職員，一位負責收銀、一位負責整餐，仲邊有人可以代勞？

曾經有開餐廳的朋友因為請唔倒洗碗而結業。此店改用紙杯碟以慳番洗碗人手本無可厚非，自助亦無可厚非(因為港人經已習慣)，但係環顧響用餐時間，此店竟然門可羅雀，是否有問題？我試過後，肯定同食物質素無關。