時新快餐店

時新快餐店，標榜著：香港人的漢堡飽。

咁樣講法，自不然令人聯想到「老麥」---果啲擺到明係外國人嘅漢堡飽囉！

兩者有何分別？其實最主要嘅分別係果舊漢堡扒---此店用的是新鮮(佢咁講、我咁講啦)牛肉，口感較軟、汁多！

我上星期五朝同姪女食左個好豐富嘅早餐，中午根本唔肚餓！但係又唔想響放中午飯嘅時候去試，祇能提早或押後食；我晚餐早食，所以我地選擇早食，十二點多便去到，那時店內約半滿。

要試，梗係試出名果種啦！因為大家都唔餓，所以每人叫左個芝士漢堡同一杯凍飲，三十幾蚊一個人！事先講明，正常人係唔飽架(我地係唔正常嘅)。

試後感：個包好似較「老麥」細少少，質素一般！果舊漢堡扒一定好過「老麥」：汁多、鬆軟，亦唔會好似前者咁咸！店內寫明：有三種汁醬可供選擇！如果唔特別聲明，便會加入店鋪秘製汁醬。

漢堡扒上面白色那些便是秘製汁醬，個人覺得冇咩嘢特別，祇是冇「老麥」果種咁酸；果片芝士亦特別薄。

我果杯凍檸水真係好一般！檸檬唔新鮮、檸檬皮好乾。

食食吓見倒隔離有位學生食緊個雙層漢堡飽，姪女話：早知我地都食果個啦！

我：「我地都咁飽，你食得落咩？」果個漢堡飽咁細，真係要食雙層嘅先夠飽、口感亦較好，當然錢亦較多---都係多四蚊啫！依家牛肉咁貴，四蚊一片漢堡扒，OK啦！

既然係快餐店，當然亦有一般快餐店提供嘅食物啦：

此店頗隱蔽：響紅磡「大酒店」對面馬路，前面有兩間花店遮住！

我搬左嚟呢區都住左廿年，從未試過此店---基本上我唔係咁喜歡食漢堡飽！不過，姪女最喜歡上網搵「米芝蓮」推介食店，此店最近好多飲食節目都有推介，咁咪滿足吓佢嘅好奇心囉！