狗口講不出China!

「垃圾會」開鑼之日，幾條新「廢棍」一早張揚會在宣誓時玩嘢，我都有啲期待架！講到尾，長毛同小丑果啲技倆真係睇到厭。雖然我都希望「垃圾會」可以正常運作（果個會一直燒緊纳税人啲銀兩架，嗚...嗚嗚），但係事與願違，有部份選民惟恐天下不亂，選左幾條好似「郁人」話齋：「咩X都唔識嘅」入去。惟有無奈等睇鬧劇囉！

果日咁啱我同「阿仔」一早定左北上開個唱，梗係唔會為左睇鬧劇而取消檔期架----佢地基本上係好事多「違」！回程時，在火車上睇倒新聞片段，慶幸我地冇取消個唱----果幾隻連小學雞都不如嘅嘢，仲幼稚過長毛之流，狗口講不出China-----编套連九流都不入嘅鬧劇！

依家啲大學生中英文都差就公認架啦！唔係我亂噏架，據我姪女講(衰衰地佢都係獵頭公司高層)：依家香港嘅大機構都傾向唔請香港嘅大學畢業生，寧願請國內或東南亞嘅大學生，因為香港近呢十幾年畢業嘅大學生質素真係太差啦！

香港難得有份「垃圾會」筍工，唔駛學歷、有齊眼耳口鼻（可能冇都得）、心盲都做得！係隻「癡蜂」唔得啫---樣衰兼出世遲呀！既然有班「懞丙」選佢地入去，好心佢地就乖乖地啦；但係垌油埕始終都係...爛泥扶唔上壁。唉！我以為佢地諗咁耐，會諗倒啲出人意表嘅嘢添，原來....噓！

一見倒其中一個look，我還以為係睇緊新馬仔做「歡樂滿東華」唱緊「萬惡滛為首之乞食」添！潮流？潮佢個屁！我認為佢地頭帶藍花會更可觀---同一時間死....喎!

響「九西」見倒佢，都咪話唔驚！希望我時運高啦。

如果我係宣誓官，我會同佢地講：你地英語發音太差啦！反正係黃皮膚，唔好扮鬼佬啦！你地啲英語連外國人都聽唔明，唔該講番廣東話啦！

另一個「低低B」讀成Re-f**king of Chi na。我知佢出晒名係粗口爛舌（難得臭草有臭罌支持），但係呢啲英語非英語、廣東話非廣東話，代表咩嘢？即係佢地潛意識希望自己係外國人，可惜卻身為中國人，所以攪到自己非驢非馬----唔係人！

計我話：呢個「正苦」超低能！過往經已有人試過響宣誓時玩嘢，「垃圾會」俾佢Tick Two, 甚至Tick Three。但係「正苦」錯過一次，就應該吸取經驗，唔俾自己錯第二次！

今次（正苦）一早講明，宣誓時必須跟足原稿讀，不可加多或減少！既然一早講左，佢地仲要玩嘢，就應該立即取消佢地資格（同届吾准参選），重選！何解要俾佢地Tick Two？擺「垃圾會」主席上檯？我相信部份選左佢地嘅人，依家都好後悔：響「九西」，如果一定要響「低低B」同「郁人」作出取捨(油鑊、定火坑)，我寧要後者！好與壞其實係對比：當有一個更衰嘅出現左，你就會覺得之前果個冇咁衰架啦！

青年新政兩名XX(我學佢地啫！佢地鍾意X吖馬)梁頌恆和游蕙禎在立法會宣誓的表現，令港人蒙羞。梁頌恆和游蕙禎用英語宣誓，並把The People’s Republic of China故意讀成The “Re-f**king" of 「支那」，然後向公眾解釋那是「鴨脷洲口音」。

請問：「鴨脷洲口音」即係咩嘢？咁啱，我好熟鴨脷洲喎！果區以前啲街坊多是漁民，佢係咪話俾人知：佢係漁民之後？「正苦」可以向漁民查證有冇佢地咁嘅發音？

如果佢地勉強解釋為鄉音，冇問題---佢地可以用中國唔同嘅方言宣誓，但一定要全段用同一種方言！我係「正苦」亦唔介意搵齊不同方言嘅人在現場翻譯。

唓！咪話左唔應該俾機會佢地Tick Two囉，仲諗咁多做咩？

一於叫佢地執包袱啦！全民投票决定都好喎：我相信香港選民，暫時都仲係正常人居多！