海洋公園員工拍紀念片 懷緬「佳佳」生活點滴
2016/10/18 08:41:07 網誌分類: 生活
| 陪伴港人十七年嘅雌性大熊貓佳佳，前晚喺海洋公園健康急遽惡化，園方安排牠「安樂死」，好多人感到難過。Kelly知道，一群曾照顧佳佳嘅園方員工，好唔捨得佳佳，園方特別為佢製作咗一條紀念影片，請嚟多位員工回憶照顧佳佳嘅生活點滴，有人向呢位重要嘅動物保育大使致敬，亦有人提到跟佳佳建立嘅深厚信任關係，不禁落淚，希望佳佳現在去到彩虹橋可以搵返佢嘅朋友。 呢段紀念佳佳嘅影片長達近三分鐘，放映咗幾張佳佳生前在園內生活嘅相片，又請來多位現任或前員工分享。動物及教育部執行總監蔣素珊希望佳佳知道，佢送咗一段珍貴回憶畀海洋公園員工、香港人及遊客。陸生動物部高級館長祝效忠形容佳佳係園內最重要嘅動物保育大使，貢獻良多，每日都話緊畀佢哋知大熊貓物種嘅新知識。獸醫總監馬伯樂就話，喺佢自己嘅祖母過身時，佢透過跟佳佳相處得到好多安慰。 前陸生動物部助理館長高詠思更一邊憶述一邊眼泛淚光，若佳佳見到熟悉嘅員工在身邊，便會毫無猶豫地伸出手讓獸醫抽血，佢話：「佢見到你或者聽到你把聲，佢會行埋嚟、挨埋嚟，想你摸吓佢，就知道佢對你有一份信任。」雖然她不能直接接觸佳佳，但佳佳不時會靠近籠邊，向高詠思示意為牠搔癢，「幫佢搔癢時，你會見到佢好開心㗎。」她希望佳佳去到彩虹橋可以搵返一班朋友。 KellyChu |
 | |
| |
 | |
|
回應 (0)
我要發表